ЖАҲОН ЧЕМПИОНАТИ ҒОЛИБЛАРИ ШАРАФЛАНДИ
Тўрақўрғон туман 1-сонли Болалар-ўсмирлар спорт мактаби 2016 йилда ташкил топган бўлиб, жамоа ўтган даврда жуда катта муваффақиятлар тўплашган. Уларнинг бисотида Ўзбекистон чемпионати ва Кубокларида қўлга киритилган 143 та олтин, 237 та бронза медаллари, Осиё ва Жаҳон чемпионатларидаги 4 та олтин, 2 та кумуш, 7 та бронза медаллари бор.
Жорий йилнинг 4-8 сентябр кунлари Татаристон республикасининг Қозон шаҳрида бўлиб ўтган миллий белбоғли кураш бўйича 2004-2006 йилларда туғилган ўсмирлар ўртасидаги Жаҳон чемпионатида ушбу мактаб спортчилари ҳам муваффақиятли иштирок этишди. Турли вазн тоифасида Дилдора Исроилжонова, Шириной Юлдашевалар олтин, Мирзажон Мирзажонов кумуш, Одилжон Пазлиддинов бронза медалларини қўлга киритишди.
Муассасада ташкилланган чемпионларни тақдирлаш маросими ёш спорт усталарининг кўргазмали чиқишлари билан бошланди.Туман ҳокими Зулайҳо Маҳкамова юрт номини юксакларга кўтаришга ҳисса қўшаётган спортчиларга миннатдорчилик билдирди. Чемпионлар ҳамда уларнинг мураббийлари, Халқаро тоифадаги ҳакам Неъматулла Тўйчиевга Ташаккурнома ва эсдалик совғалари топширилди.
