Сўнгги янгиликлар
Янгиликлар
БАҒРИКЕНГЛИК-ХАЛҚИМИЗГА ХОС УЛУҒ ФАЗИЛАТ
Маълумки, ҳар йили 16 ноябрда бутун мамлакатимизда Халқаро бағрикенглик куни нишонланади. Шу муносабат билан “Бағрикенглик ҳафталиги” ўтказилиб, унда дўст-иноқ бўлиб яшаётган турли миллат вакиллари иштирокида тадбирлар, суҳбат, учрашувлар ташкилланади.
Кейинги йилларда муҳтарам Президентимизнинг одилона сиёсатлари туфайли қўшни мамлакатлар билан дўстона алоқаларимиз янада мустаҳкамланди. Чунки аҳиллик бор жойда тинчлик ва ривожланиш бор.
Ҳафталик доирасида Тўрақўрғоннинг ташриф қоғозларидан бири бўлган Ахсикент очиқ осмон остидаги музей худудида “Миллатлараро тотувлик ва диний бағрикенглик” мавзусида кенг қамровли дастур ўтказилди. Унга туманимизда яшовчи ўзбек, рус, қирғиз, тожик, украин миллатига мансуб оилаларнинг вакиллари таклиф этилдилар. Ахсикентнинг 11-12 асрлардаги қорахонийлар даврига тўғри келадиган ноёб қазилма бойликлари ўша пайтда ҳам одамлар ҳунарманд ва тадбиркор бўлганидан далолат беради. Яқин даврларда бу ерда катта лойиҳалар амалга оширилиб, туризм салоҳияти янада кенгайиши устида иш олиб бориляпти.
Тадбирда туман ҳокимининг ўринбосари Азамат Абдукаримов иштирок этди.
100 НАФАР СПОРТЧИ ТАҚДИРЛАНДИ
Тўрақўрғон - спортчилар юрти. Ҳозирда 10 нафар Жаҳон чемпионлари, 30 нафар Жаҳон чемпионати совриндорлари, мингдан ортиқ Ўзбекистон чемпионлари бор.
Биргина мисол, яқинда Украинанинг Львов шаҳрида белбоғли кураш бўйича Жаҳон чемпионатида Ўзбекистон миллий терма жамоаси таркибида тўрақўрғонлик спортчилар ҳам иштирок этиб, битта олтин, иккита бронза медалларини қўлга киритишди.
Истамбул шаҳрида бўлиб ўтган каратэ бўйича Жаҳон чемпионатида эса мураббий Илёсбек Луқмоновнинг 2 нафар шогирдлари олтин ва кумуш медаллар билан қайтишди.
Хоразм вилоятининг Урганч шаҳрида 2021 йил 1-3 октябр кунлари ташкил этилган дзюдо бўйича Ўзбекистон Кубоги мусобақасида 3 нафар спортчи қизлар катта ютуқларга эгалик қилиб, 2024 йилда Парижда бўлиб ўтадиган ёзги Олимпия ўйинларида иштирок этиш учун Ўзбекистон миллий терма жамоаси сафига қабул қилиндилар.
Бундай ютуқлар албатта эътирофга муносиб. Туман маданият марказида ана шундай спортчи ёшлардан 80 нафари туман ҳокимлигининг қимматбаҳо совғалари билан мукофотланди.
Туман ҳокимининг биринчи ўринбосари Элёржон Турғунов Тўрақўрғон шуҳратини ошираётган бу йигит-қизлар ва уларнинг мураббийларига миннатдорчилик билдириб, келгуси мусобақаларда ҳам омадлар тилади.
ЯНА БИР МАКТАБ ФОЙДАЛАНИШГА ТОПШИРИЛДИ
Тўрақўрғон туманидаги 49-умумтаълим мактабида 526 нафар ўқувчига 54 нафар педагог ходимлар таълим-тарбия бериб келмоқдалар.
Анчагина таъмирталаб аҳволга келиб қолган муассасага ва ниҳоят инвестиция давлат дастури бўйича қурилиш ва таъмир учун давлат томонидан 3. 919. 565 минг сўм маблағ ажратилганда нафақат жамоа, балки бутун маҳалла аҳли хурсанд бўлишди. мавжуд 330 ўринли бино қайта мукаммал таъмирланди, Янги 210 ўринли бино "Осим қурилиш дизайн" МЧЖ қурувчилари томонидан тезда ва сифатли қуриб битказилди.
-Эътиборга муносиб равишда кўрсаткичларимиз ҳам йилдан йилга ўсиб бормоқда. Мисол учун, ўқувчиларимизнинг ОТМга киришлари ўтган йили 15 фоиздан юқори бўлган бўлса, бу йил 22 фоиздан ошди. 11-синф битирувчиларининг ҳам тўла бандлиги таъминланди,-дейди директор Матлуба Абдуллаева.
Мактаб биносининг очилиш маросими катта тантанага айланиб кетди. Унда туман ҳокими Зулайҳо Маҳкамова, туман прокурори Элёрбек Талабоев, фахрийлар, ёшлар вакиллари иштирок этишди.
Шинам ва ёруғ синф хоналари, уларга мос равишдаги янги жиҳозлар кишининг ҳавасини келтиради. Ўқувчилар ва ўқитувчилар бундай шароитдан мамнун эканликларини билдирдилар.
Туман раҳбарлари мактаб ҳовлисига эсдалик учун кўчатлар ҳам экиб бердилар.
Шошилинч тиббий ёрдам бўлими янги бинода
Тўрақўрғон туман марказий шифохонасининг шошилинч тиббий ёрдам бўлими 2001 йилда собиқ болалар бўлими биносини ҳашар усулида капитал таъмирлаш йўли билан ташкил қилинган.
Шу бино Давлат инвестиция дастурига биноан 2020-2021 йиллар давомида мукаммал реконструкция қилинди. Қўшимча 2 қаватли бино қурилди. Қурилиш - таъмирлаш ишлари “Осим қурилиш дизайн” МЧЖ томонидан олиб борилди. Бунинг учун 13 млрд. 197 млн. сўм маблағ сарфланди. Эндиликда ушбу бўлим таркибида алоҳида беморларни шошилинч қабул қилиш блоки, диагностика блоки, анестезиология – реанимация бўлими операция блоки билан, 10 ўринли шошилинч хирургия, 10 ўринли шошилинч терапия ва 10 ўринли шошилинч педиатрия постлари мавжуд. Ушбу бўлимда 28 нафар врач, 110 нафар ўрта тиббиёт ходимлари ва 62 нафар кичик тиббиёт ходимлари фаолият кўрсатади.
Энг замонавий услубда қайта кўрк ростлаган бинонинг очилиш маросимида тиббиёт соҳаси фахрийлари, инсон саломатлиги учун ҳормай меҳнат қилаётган шифокорлар, аҳоли вакиллари жам бўлдилар.
Туман ҳокими Зулайҳо Маҳкамова эртага нишонланадиган касб байрамлари ва янги бино тақдимоти билан жамоани муборакбод этди. Меҳнат фахрийси Аҳмаджон Худойназаров соҳага қаратилаётган эътибор ҳақида тўлқинланиб сўзлади ва бу шароитларни қадрлаб ишлаш лозимлигини билдирди.
Шинам ва барча зарур тиббиёт асбоблари билан жиҳозланган хоналарни кўриб, аввало ҳеч ким бемор бўлмасин, келган дардмандлар бутунлай соғайиб оиласига қайтсин, дея дуо қилинди маросимда.
ЯНГИ ЎЗБЕКИСТОННИНГ ЯНГИ БОҒЛАРИ ТЎРАҚЎРҒОНДА ҲАМ БАРПО ЭТИЛМОҚДА
Республикамизнинг барча худудларида бўлгани каби Тўрақўрғонда ҳам манзарали ва мевали кўчатлар экиш қизғин давом этяпти. Ҳам экологик мусаффолик, ҳам витаминларга бой мева-сабзавот етиштиришни кўпайтириш мақсадидаги ушбу ташаббус кенг қўллаб-қувватланаётганлиги билан аҳамиятлидир.
Туманда "Яшил майдон" лойиҳаси доирасида 2021 йил кузи ва 2022 йилнинг баҳор мавсумларида 1 миллион 674 минг 477 туп манзарали, мевали ҳамда бутали кўчатлар ва қаламчалар экиш режалаштирилган.
“Тўрақўрғон ИЭС” яқинидаги “Шоҳидон нурли диёр” массивида тадбиркор Абдуғани Қозоқов ўз ҳисобидан 4, 5 миллиард сўм сарфлаб жами 50 гектар майдонда 175 минг тупдан зиёд кўчатлар экиб, кичик ўрмонзор ва боғ барпо қилиш ташаббуси билан чиққан эди.
Бугун ана шу масканда дастлабки кўчатлар экиш тадбири бўлиб ўтди. Унда вилоят ҳокими Шавкатжон Абдураззоқов, вилоят прокурори Жаҳонгир Ҳотамов, нуронийлар, ёшлар вакиллари, жамоатчилик иштирок этишди. Наманган ўрмон хўжалигидан келтирилган манзарали дарахтлар, тадбиркор томонидан етиштирилган экспортбоп, эртапишар кўчат ниҳоллари ўтқазилди.
