Сўнгги янгиликлар
Янгиликлар
“ОБОД ҚИШЛОҚ”ДАГИ МАКТАБ ФОЙДАЛАНИШГА ТОПШИРИЛДИ
Қадимий Ахсининг бир қисми ҳисобланган Яккатом маҳалласи жорий йилда “Обод қишлоқ” Давлат дастурига тушиб, чирой очди. Электр энергияси, ичимлик суви таъминоти, йўллар ҳолатини яхшилаш билан бирга мавжуд бино-иншоотлар, хонадонлар замон талабларига мос қайта таъмирланди. Айниқса, 1989 йилда, яъни, ўттиз йил олдин қурилган 22-умумтаълим мактабини мукаммал таъмирлаш учун 4,5 миллиард сўм ажратилиши аҳолини беҳад қувонтирди.
Баҳорда “Сардорбек Арслонбек транс” хусусий корхонаси томонидан бошланган ишлар ниҳоясига етиб, таълим даргоҳи гўзал қиёфа касб этди. Унинг тақдимот маросимига бутун қишлоқ аҳли жам бўлишди.
-Таълим-тарбияга эътибор давлатимиз томонидан ҳамиша биринчи ўринга қўйилган, бундан буён ҳам шу тарзда давом этади. Чунки муҳтарам Президентимиз кучли билим ва тафаккурга эга келажак авлодларга катта умид билан қараб келмоқдалар,-деди маросимда иштирок этган туман ҳокимининг биринчи ўринбосари Элёрбек Турғунов.
Мактабга узоқ йиллар директорлик қилган Иброҳимжон Ибрагимов ва бошқалар ғамҳўрлик учун миннатдорлик изҳор қилган бўлсалар, аҳил жамоа тайёрлаган бадиий дастур меҳмонларга ажиб кайфият бахш этди.
-Мактабимизда шароитлар мукаммал бўлди, бу йил 48 нафар битирувчиларимиздан 18 нафари олий таълимга киришга муваффақ бўлишди. Навбатдаги ўқув йилида натижаларимиз бир неча баробар ошади, бунга бурчлимиз,-деди директор Дилором Тожибоева.
ТЎРАҚЎРҒОН-МИНГБУЛОҚ ЙЎЛИ УЗУМЗОРГА АЙЛАНАДИ
Вилоят ҳокими Шавкатжон Абдураззоқовнинг туманларда намунали лойиҳа асосида қурилган коттежлар олд майдонларининг бўш турган қисмини узумзорга айлантириш бўйича берган тавсиялари асосида Тўрақўрғонда ҳам ҳаракатлар бошлаб юборилган.
Туман марказидан Мингбулоқ чегарасигача бўлган оралиқда жойлашган 13 та маҳалла фуқаролар йиғинидаги 670 хонадон 13 километр масофадаги 35 гектар майдонда узум етиштирдилар. Шу муносабат билан айни кунларда ток кўчатлари экиш акцияси эълон қилинди ва қисқа муддатда 134.500 дона кўчат ва қаламчалар ўтқазилди. “Келин бармоқ”, “Ризамат ота” каби энг харидоргир ва серҳосил, экспортбоп навлар кўчатлари маҳаллий узумчи боғбонлар томонидан етказиб берилмоқда.
Ҳисоб-китоб қилинишича, ушбу майдонлар ҳосилидан йилига 2 миллиард 60 миллион сўмгача даромад олиш мумкин экан. Ҳам оила иқтисодини мустаҳкамлаш, ҳам қўшимча иш ўринлари яратилиши эса янада манфаатли.
Туман ҳокими Зулайҳо Маҳкамова “Яшил макон” умуммиллий лойиҳаси доирасида “Озод” маҳалласида ток кўчатлари экиш тадбирида иштирок этди.
ВОЯГА ЕТМАГАН БОЛАДА - 1 МИНГ 200 ДОНА ПИРОТЕХНИКА ВОСИТАСИ?
Туман ички ишлар бўлими ҳуқуқбузарликлар профилактикаси бўлинмасининг вояга етмаганлар ва ёшлар ўртасида ҳуқуқбузарликлар профилактикасини ташкил этиш гуруҳи ходимлари томонидан таълим муассасаларида вояга етмаганлар ўртасида пиротехника воситаларидан фойдаланмаслик, уларни олиб сотиш билан шуғулланмаслик борасида тарғибот тадбирлари ўтказилмоқда.
Профилактик ишлар жараёнида Хўжанд МФЙ ҳудудидаги 2-касб-ҳунар мактаби ўқувчиси, Қўшқайрағоч МФЙда яшовчи, Ҳ. Ғ.да жами 1 минг 200 дона пиротехника воситалари борлиги маълум бўлди. Яна бир вояга етмаган Мингбулоқ тумани 14-мактаб ўқувчиси Ҳ. Ж. яшаш хонадонида ана шундай воситаларни сотаётганлиги аниқланди. Ўзбекистон Республикаси Маъмурий жавобгарлик тўғрисидаги кодекснинг 185-моддасига асоосан ҳужжатлар расмийлаштирилиб, Болалар масалалари бўйича туман комиссиясига чора кўришлик учун юборилди.
БОЛАДА КАСТЕТ НИМА ҚИЛАДИ?
ИИБннг айни шу гуруҳи томонидан “Тиғ” тадбири ўтказилаётган пайтда Бураматут маҳалласи ҳудудида жойлашган 28-мактаб ўқувчиси М. Ҳ. нинг ёнида пичоқ, Тошкент маҳалласи ҳудудидаги 1-касб-ҳунар мактаби ўқувчиси А. Ж.нинг ёнида эса кастет борлиги аниқланди. Мазкур ҳолат бўйича ҳам ҳужжатлар расмийлаштирилиб, тегишли комиссияга чора кўришлик учун юборилди.
Бундай ҳолларга педагоглар ва ота-оналар беэътибор бўлмасликлари керак. Чунки айни шундай совуқ қуроллар аянчли оқибатларга олиб келиши мумкин.
Тўрақўрғон тумани ҳокими Зулайҳо Маҳкамованинг Конституция байрами муносабати билан туман аҳлига ТАБРИГИ
Бугун сизлар билан мамлакатимиз бўйлаб нишонланаётган яна бир қутлуғ сана-Конституциямиз қабул қилинганлигининг 29 йиллик байрамини нишонлаяпмиз.
Сўзимнинг аввалида бутун туманимиз аҳлини ушбу қутлуғ айём билан чин қалбимдан табриклаб, самимий тилаклар билдираман.
Давлатимиз шу йиллар давомида босиб ўтган ғоят мураккаб ва шарафли йўл Бош Қомусимизнинг ҳаётбахш кучи ва улкан салоҳиятидан далолат беради.
Асосий қонунимиз негизида яратилган Ҳаракатлар стратегияси бугунги кунда жонажон Ватанимиз тараққиётини янги босқичга кўтаришда, тадбиркорликни ривожлантириш, халқ билан доимий мулоқотда бўлиш, одамларнинг ташвиш-муаммоларини ҳал этиш, уларни рози қилишда беқиёс ўрин эгалламоқда.Биргина жорий йилнинг ўзида ушбу масалаларда туманимизда олиб борилган ишлар сарҳисобини қилсак, юқоридаги фикрлар исботини топади.Барча соҳаларда эришилаётган юқори натижалар негизида Конституциямизда белгилаб берилган ҳуқуқий асослар мавжуд.Одамларнинг турмуш шароитларини янада яхшилаш, ижтимоий соҳа объектларини янгидан қуриш, реконструкция қилиш, бир сўз билан айтганда туман аҳолисига қулай шарт-шароитлар яратиш бўйича бошланган кенг кўламли ишлар келгуси йилда ҳам қизғин давом эттирилади.
Юртимиз тинчлиги, Ватанимиз равнақи, фуқароларимизнинг ҳуқуқ ва эркинликларини таъминлаш, ўғил-қизларимизнинг илмга, ҳунарга бўлган интилишларини ҳар томонлама кучайтириш, тадбиркорлик ташаббусларини қўллаб-қувватлаш келгусида ҳам ислоҳотларимиз марказида бўлади. Азиз дўстлар!Сизларни Конституция байрами билан яна бир бор муборакбод этаман. Барчамизга келгуси йилда ҳам соғ-саломат ва хуш кайфиятда яшаб, меҳнат қилиш насиб этсин!
ВАКЦИНАЦИЯЛАШНИНГ «БУСТЕР ДОЗА»СИ НИМА?
Бугунги кунда «КОВИД-19»га қарши вакцинациялашнинг «бустер дозаси» тўғрисида гап кетмоқда. У нима ва аҳоли қандай қилиб бу билан эмланади?
- Мамлакатимизда «КОВИД-19»га қарши эмлаш ишлари давом этмоқда ва аҳолининг асосий қисми вакцинанинг керакли дозаларини олиб бўлди. Эндиги босқичда 2 ва 3-дозаларни олганларда иммун тизими мустаҳкамлигини таъминлаш мақсадида улар «бустер доза»ни олишлари шарт, деган қарорга келинди, - дейди туман тиббиёт бирлашмаси бошлиғининг даволаш ишлари бўйича ўринбосари Абдусаттор Тўйчибоев.- Шунинг учун жорий йилнинг 15 ноябридан бошлаб республика аҳолисини «бустер доза» билан эмлаш бошланди.
Мутасаддининг билдиришича, туманимиз бўйича 4 декабргача бўлган муддатда 109 минг 604 киши «КОВИД-19»га қарши эмланди. Эндиги босқичда организмда инфекцияга қарши иммунитетни янада мустаҳкамлаш учун эмланганига 6 ой ва ундан ортиқ муддат ўтганлар «бустер доза»ни қабул қиладилар.
Айни пайтда туманда 5 та турдаги вакциналар билан эмлаш ишлари давом этмоқда. «Бустер доза»ни эса вакциналарнинг ҳар қанақа туридан фойдаланган ҳолда олса бўлади. Фуқаро мазкур доза билан икки ёки уч марта эмас, балки бир маротаба эмланади холос. Эмлаш тумандаги профилактика тиббиёт муассасаларида бепул амалга оширилади.
Яна бир бор эслатамиз, «Бустер доза»ни олиш учун аввалги вакцинацияланишдан сўнг 6 ой муддат ўтган бўлиши шарт. Вакцинанинг фақат биринчи дозасини олган фуқаро бу гуруҳга кирмайди.