Сўнгги янгиликлар
Янгиликлар
❗️2022 йил 1 январдан автомобил сотиб олганлик учун йиғим тўлиқ бекор қилинди
2022 йил учун Ўзбекистон Республикасининг Давлат бюджети тўғрисидаги Қонун матни эълон қилинди (https://www.lex.uz/pdfs/5801127).
Ушбу Қонунда автомобилни сотиб олганлик учун йиғим назарда тутилмаган. Демак, ушбу йиғим 1 январдан тўлиқ бекор қилинди.
Бунгача амалда бўлган тартибга кўра, автосалондан янги машина сотиб олганда шартнома нархининг 3%и миқдорида йиғим тўланарди (масалан, 100 млн сўмлик машина учун 3 млн сўм, 300 млн сўмлик бўлса 9 млн сўм).
Агар иккиламчи бозордан машина сотиб олинганда ишлаб чиқилган йилига қараб ҳар бир от кучи учун 29 минг 700 сўмгача йиғим олинарди. Масалан, ишлаб чиқарилганига 3 йил тўлмаган 100 от кучига тенг машинани сотиб олганлик учун деярли 3 млн сўм йиғим тўланарди.
Энди шу йиғимлар 1 январдан тўлиқ бекор қилинди.
Агар кимдир машина сотиб олгану, лекин ўз номига расмийлаштиришдаги катта харажатдан қочиб, "генеральная доверенность" олиб ҳайдаб юрган бўлса, унда эндиликда машиналарини ўз номларига ўтказиб олишлари мумкин. Тўғри, ҳозир нотариусда тўланадиган давлат божининг юқори ставкалари ўз кучида турибди, аммо тез орада давлат божлари ҳам камайтирилиши кутилмоқда. Янада аниқроқ айтганда машинанинг от кучи ва йилидан қатъи назар базавий ставканинг 3 баробари (810 минг сўм) этиб белгиланиши режалаштирилмоқда.
Қуйидаги расмда давлат божининг амалдаги ставкалари келтирилган. Агар бу нархлар сизга маъқул келса, унда тезда машинангизни ўз номингизга ўтказиб олинг. Ёки божлар ҳам камайтирилишини кутиб турсангиз бўлади.
ТУМАН МАРКАЗИДА ЯНГИ ЙИЛ БАЙРАМИ унда туман аҳолисининг барча қатлами иштирок этди
Бош арчамиз қад ростлаган майдонда эрталабдан байрам шодиёналари бошланди. Қорбобо, Қорқиз, эртак қаҳрамонлари барчани хурсандчиликка чорлади.
Туман ҳокими Зулайҳо Маҳкамова Янги йил табригини йўллар экан, “тарих зарварақларига кузатиб қўйилаётган 2021 йилда меҳнатда чиниққан, мард ва саботли халқимиз билан олдимиздаги барча соҳаларда режаларни уддалашга эришдик. Йил давомида “Инсон қадри” тамойилига амал қилиб, аҳолини ижтимоий қўллаб-қувватлаш, уларнинг турмуш фаровонлигини янада яхшилаш, кам таъминланган оилаларга эътибор қаратиш асосий фаолиятимиз марказида бўлди. Шу билан бирга тадбиркорликни ривожлантириш, янги иш ўринлари яратиш учун бор имкониятларни ишга солдик. Кириб келаётган 2022 йилда режаларимиз бундан-да кенг қамровли”, дея самимий тилакларни билдириб ўтди.
Байрамда эл суйган хонанда Жалолдин Усмонов, туман маданият бўлимининг санъаткорлари концерт дастурини намойиш этишди.
Болажонларга байрам совғалари улашилди, йил давомида спортда катта муваффақиятларга эришган ёшлар алоҳида тақдирланди.
Халқ депутатлари Тўрақўрғон тумани кенгашининг сессияси бўлиб ўтди
Уни туман ҳокими, Халқ депутатлари туман кенгаши раиси Зулайҳо Маҳкамова олиб борди.
Кун тартибидаги асосий масала “Наманган вилояти Тўрақўрғон туманининг 2022 йил учун маҳаллий бюджети тўғрисида” туман молия бўлими мудири Умиджон Ахмедходжаевнинг маърузаси тингланди.
Айтиб ўтилганидек, 2022 йилда туман бюджети маҳаллий даромадлар 79 миллиард 507 миллион 284 минг сўм, юқори бюджетдан трансфертлар миқдори 156 миллиард 592 миллион 328 минг сўм, ҳаражатлар эса 236 миллиард 99 миллион 612 минг сўмдан иборат бўлади.
Ўтиб бораётган 2021 йилда аҳоли турмуш фаровонлигини ошириш, жумладан, йўлларни ободонлаштириш, ичимлик суви, электр энергияси таъминотини яхшилаш бўйича катта ишлар амалга оширилди. 2022 йилда ҳам бу ҳаракатлар изчил давом эттирилади. Энг чекка ҳудудларга эътибор қаратилади. Шу билан биргаликда тадбиркорлик, оилавий бизнесни янада кучайтириш, хонадонларда томорқадан самарали фойдаланиш, чорвачилик, ҳунармандчилик, боғдорчиликни ривожлантириш борасида белгиланган тартибда кўмаклашилади.
Сессияда, шунингдек, қишлоқ хўжалигига мўлжалланмаган ерлар учун жисмоний ва юридик шахслар бўйича мутлоқ миқдорда белгиланган базавий солиқ ставкасига киритилаётган камайтирувчи ва оширувчи коэффицентларни тасдиқлаш тўғрисидаги масала ҳам кўриб чиқилди.
Ҳар икки масала юзасидан тегишли қарорлар депутатлар томонидан тасдиқланди.
Аҳолининг айрим тоифаларига нисбатан шахсга доир маълумотларни йиғиш
Аҳолини рўйхатга олишни ўтказиш санасида чақирув асосида муддатли ҳарбий хизматни ўтаётган ҳарбий хизматчилар бўлган, шунингдек контракт бўйича ҳарбий хизматга жалб этилган ҳарбий хизматчилар бўлган ва уларнинг ёпиқ ҳудудларда яшаётган оила аъзоси бўлган респондентлар ҳақидаги шахсга доир маълумотларни йиғиш ҳарбий қисм командири ёки у ваколат берган шахс томонидан амалга оширилади. Аҳолини рўйхатга олишни ўтказиш санасида:болалар интернатларида, тарбия муассасаларида, «Болалар шаҳарчалари»да;ижтимоий муассасаларда; диний муассасаларда; шифохоналарда ва бошқа соғлиқни сақлаш ташкилотларида;зўравонликдан жабрланган шахсларни реабилитация қилиш ва мослаштириш ҳамда ўз жонига қасд қилишнинг олдини олиш марказларида; қамоқда сақлаш жойларида, тергов ҳибсхонасида, ахлоқ тузатиш муассасаларида ва махсус муассасаларда яшаётган (бўлган) респондентлар тўғрисидаги шахсга доир маълумотларни йиғиш ушбу қисмда назарда тутилган муассасалар ҳамда ташкилотлар маъмуриятлари томонидан амалга оширилади.Ўзбекистон Республикасининг дипломатик ваколатхоналари ва консуллик муассасалари, шунингдек Ўзбекистон Республикасининг халқаро ташкилотлар ҳузуридаги ваколатхоналари ходимлари бўлган Ўзбекистон Республикаси фуқаролари ҳамда уларнинг ўзи билан бирга бўлган оила аъзолари, шу жумладан Ўзбекистон Республикаси Ташқи ишлар вазирлиги томонидан халқаро ҳукуматлараро ташкилотлардаги квоталанган лавозимларга юборилган фуқаролар Ўзбекистон Республикаси Ташқи ишлар вазирлиги томонидан рўйхатга олиниши лозим. Ўзбекистон Республикаси Ташқи ишлар вазирлигида аккредитация қилинган чет давлатлар доимий ваколатхоналарининг, халқаро, ҳукуматлараро ташкилотлар ва чет давлатлар ҳукумат ташкилотлари ваколатхоналарининг ходимлари бўлган чет эл фуқаролари ҳамда уларнинг оила аъзолари, шунингдек Ўзбекистон Республикасининг халқаро шартномаларига мувофиқ дипломатик имтиёзларга ва иммунитетга эга бўлган бошқа шахслар рўйхатга олинмайди.
ТЎРАҚЎРҒОНДАГИ ЙИРИК САНОАТ КОРХОНАСИНИНГ ИККИНЧИ НАВБАТИ ИШГА ТУШДИ
Шу муносабат билан ташкилланган тадбирда вилоят ҳокими Шавкатжон Абдураззоқов иштирок этди.
-Оқтош шаҳарчаси азалдан саноат маскани бўлиб келган. Президентимиз томонларидан республикамизнинг барча ҳудудларида саноатни ривожлантириш, модернизация ва диверсификация қилиш, янгидан-янги корхоналарни барпо этиш ҳамда маҳсулотларнинг сифат даражасини оширишга алоҳида эътибор қаратилаётгани туфайли ҳудуд ўз мақомини тикламоқда,-деди вилоят раҳбари.
“OQTOSH TEKSTIL” МЧЖ корхонаси 2017 йилнинг февраль ойида қурилиши бошланиб, момиқ сочиқ маҳсулотлари ишлаб чиқариш лойиҳасини 3 та босқичда амалга ошириш ҳамда 22 млн.доллар инвестиция маблағлари сарфлаш ва 1800 нафар янги иш ўринларини яратиш режалаштирилганди.
Ҳозирга қадар 19 млн.доллар маблағ (шундан14,5 млн.долл. маҳаллий тадбиркор, 4,5 млн.долл. банк кредити) жалб этилиб, лойиҳанинг 1 ва 2-босқичи ишга туширилди ва 800 та доимий янги иш ўринлари яратилди.
Корхонанинг 2-босқичи ишга тушиши натижасида йилига 5,2 минг тонна жаҳон стандартларига мос ва импорт ўрнини босувчи ҳар-хил турдаги момиқ сочиқ маҳсулотлари ишлаб чиқариш фаолияти йўлга қўйилди ва йиллик 10 млн.долларгача тайёр маҳсулотлар экспорти амалга оширилади.
Тадбирда бир гуруҳ фидоий ишчиларга Янги йил байрами муносабати билан қимматбаҳо эсдалик совғалари топширилди.
