Сўнгги янгиликлар
Янгиликлар
Президент Шавкат Мирзиёев бугун "Заковат" интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида"ги қарорни имзолади.
2021 йил октябрь ойида давлатимиз раҳбари Бухоро вилояти Ромитан туманида “Заковат” интеллектуал ўйинининг финал босқичига ташриф буюриб, баҳсни кузатган, тадбир сўнгида нутқ сўзлаб, билимдон ёшларга шароит яратиш учун кўплаб ташаббусларни билдирган эди.
Ушбу ташаббуслар ижросини таъминлашга қаратилган кенг кўламли чора-тадбирлар Президент қарорида белгилаб берилди. Жумладан:
— Ёшлар ишлари агентлиги зиммасига “Заковат” интеллектуал ўйини ва бошқа интеллектуал ўйинларни тизимли равишда ривожлантиришга доир вазифалар юкланди;
— 2022/2023 ўқув йилидан бошлаб интеллектуал ўйинларнинг республика босқичида ғолиб бўлган ўқувчи ёшлар ва талабалар учун йил давомида ҳар ойда бериладиган “Заковат” стипендияси жорий этилади;
— 2022 йилдан бошлаб, босқичма-босқич умумий ўрта, Президент, ўрта махсус ва профессионал ҳамда олий таълим муассасаларида “Заковат” интеллектуал клублари фаолияти йўлга қўйилади ҳамда ҳудудлардаги Ёшлар марказларида интеллектуал ўйинлар жамоалари учун алоҳида хоналар ташкил этилади;
— 2022 йилдан бошлаб ҳар йили талабалар ўртасида Интеллектуал олимпиада ташкил қилинади. Унда умумжамоа ҳисобида дастлабки учта ўринни қўлга киритган олий таълим муассасасига Ўзбекистон Республикаси Президенти совғаси топширилади;
— интеллектуал ўйинларнинг республика босқичида ғолиб ва совриндор бўлган умумий ўрта, ўрта махсус ва профессионал таълим муассасалари ўқувчилари ҳамда ОТМ талабалари таълимнинг кейинги босқичига базавий тўлов-контракт асосида имтиҳон синовларисиз қабул қилинади;
— таълим муассасаларида ташкил этилган “Заковат” интеллектуал клубларининг координатори бўлган профессор-ўқитувчиларга меҳнатга ҳақ тўлаш фондининг 50 фоизи миқдорида бир марталик устама тўлаб берилади;
— 2022/2023 ўқув йилидан бошлаб ҳар йили апрель ойида “Интеллектуал ҳафталик” тадбири ўтказиб борилади;
— ёшларнинг интеллектуал салоҳиятини ошириш, уларга мотивация бериш мақсадида машҳур олимлар, жумладан, Нобель мукофоти соҳиблари билан учрашувлар ташкил этиб борилади;
— “Заковат” ва бошқа интеллектуал ўйинларининг ҳудудий ва республика босқичи ғолибларини ўз мутахассислиги бўйича кадрлар захирасига олиш ҳамда раҳбарлик лавозимларига тайинлаш амалиёти йўлга қўйилади;
— Тошкент вилояти Бўстонлиқ туманидаги “Ёшлар оромгоҳи”да мавсумий ишлайдиган “Интеллектуал мактаб” лойиҳаси йўлга қўйилади;
— “Янги Ўзбекистон боғи”га туташ ҳудудда “Заковат интеллектуал ўйинлари клуби” учун алоҳида бино ҳамда “Интеллектуал ўйинлар шаҳарчаси” барпо этилади. Мазкур бинолар Ёшлар ишлари агентлигининг балансида бўлади;
— интеллектуал турнирлар ташкил қилиш, билимдон ёшларни рағбатлантириш, ёш авлоднинг интеллектуал салоҳиятини оширишга қаратилган компьютер ва мобиль ўйинларни яратган дастурчиларга грант ва субсидиялар ажратиш мақсадида 2022 йилда 50 млрд сўм миқдорида, кейинги йилларда асосланган ҳисоб-китобларга мувофиқ давлат бюджетидан маблағ ажратилади.
ЗАМОНАВИЙ БИЛИМ ВА ФАОЛ ҲАРАКАТ БИЛАНГИНА МАҚСАДГА ЕТИШ МУМКИН
Туман ҳокими Зулайҳо Маҳкамова ёшлар билан учрашувда шу иборага урғу берди
“Обод қишлоқ” Давлат дастури доирасида мукаммал таъмирдан чиқарилган 22-мактабда ташкилланган учрашувга барча маҳаллалардан ёшлар таклиф этилдилар.
Учрашув аввалида туман раҳбари бугунги қайноқ ҳаётда кечаётган жараёнлар, янгиликлар, ислоҳотлар мазмун-моҳиятига кенг тўхталди. Ҳақиқатан ҳам ёшлар мустақил ҳаётга бирор чет тилини ўрганиб ва ҳунарли бўлиб қадам қўйишлари лозим. Акс ҳолда турли муаммолар гирдобида қолаверадилар. Шу ҳолатга тушмаслик учун маҳаллаларда иш бошлаган ёшлар масалалари бўйича вилоят ҳокимининг ҳамда иқтисодий масалалар бўйича туман ҳокимининг ёрдамчиларидан фойдаланиш зарур. Яккатом маҳалласида фаолият бошлаган ёшлар бўйича ёрдамчи Жамолхон Акромхонов фикрлари мисолида бу ҳақда иштирокчиларга тўлиқ маълумот берилди.
Учрашувда туман ҳокими Зулайҳо Маҳкамовага турли масалаларда мурожаатлар бўлди. Жумладан, Умаржон Юнусалиев, Абдураҳим Тўхтахўжаев, Муҳаммадали Комилжонов, Садоқат Каримова каби ўндан ортиқ ёшлар ишга жойлашиш бўйича ёрдам сўрашди. Туман бандликка кўмаклашиш марказида ҳозирда 937 та бўш иш ўринлари рўйхати мавжуд бўлиб, мурожаатчиларга танишиб чиқиш тавсия этилди.
Республикамизнинг турли вилоятларида жойлашган олийгоҳларда ўқиётган йигит-қизлардан 5 нафари контракт пулларини тўлашда кўмак сўрашди. Зулайҳо Маҳкамова албатта, уларнинг оилавий шароитларини ўрганиб чиқилишини билдириб, шу билан бирга талабаларга уйларида кичик тадбиркорлик билан шуғулланишлари, иссиқхона, паррандачилик, чорвачилик, кўчатчиликка киришиб, даромад топиш ҳаракатида бўлишларини мисоллар орқали тушунтирди.
Бугун давр шиддатли. Замонавий билимга эга, фаол ҳаракатда бўлган инсонгина олдига қўйган мақсадларига эришиши мумкин. Бунинг учун барча шароитлар етарли. Фақат вақтни қадрлаб, ўрганиш, изланиш, меҳнат қилиш орқалигина уларга етишиш мумкин.
Аҳолини рўйхатга олиш ишларига жалб этиладиган ходимлар тоифалари
Республика миқёсида аҳолини рўйхатга олишга тайёргарлик кўриш ва уни ўтказишда Давлат статистика қўмитаси марказий аппарати ходимлари иштирок этади, ҳудудларда ишларни ташкил этиш ва мувофиқлаштириш, материалларни автоматлаштирилган ҳолда қайта ишлаш, дастлабки якунларни сарҳисоб қилиш ва натижаларни эълон қилиш учун Қорақалпоғистон Республикаси, вилоятлар ва Тошкент шаҳар статистика бошқармалари, туманлар ва шаҳарлар статистика бўлимлари ходимлари жалб этилади. Алоҳида даврларда норматив-ҳуқуқий ҳужжатлар, қўлланма ва маълумотнома ҳужжатларини ишлаб чиқишда иштирок этиш, аҳолини рўйхатга олишни молиявий ва моддий-техник таъминлашда ҳисоб-китобларни тайёрлаш учун қўшимча равишда шартнома асосида штатда бўлмаган юқори малакали мутахассислар вақтинчалик жалб этилади. Туман ва шаҳар миқёсида рўйхатга олиш, инструкторлик, ҳисоб ва стационар участкаларда ишларни ташкил этиш ва мувофиқлаштириш учун тўлов-шартнома асосида ходимлар жалб этилиши мумкин. Регистраторлар шаҳар ва қишлоқ аҳоли пунктларидаги уйларнинг тайёргарлик босқичида аввал тузилган рўйхатларини ва картографик материалларни аниқлаш (аниқ ҳудуддаги уйларнинг ҳақиқатда мавжудлигини текшириш) учун тўлов-шартнома асосида жалб этилади.Регистраторларни давлат статистикаси органлари ва уй-жой фондидан фойдаланувчи ташкилотлар ходимлари орасидан танлаб олиш туманлар ва шаҳарлар ҳокимликлари томонидан давлат статистикасининг ҳудудий органлари билан биргаликда ташкил этилади. Давлат статистикаси органлари ходимлари, олий таълим муассасалари ўқитувчилари ва юқори курс талабалари, академик лицейлар, касб-ҳунар коллежлари ва умумтаълим мактаблари ўқитувчилари орасидан рўйхатга олиш участкалари мудирлари, инструкторлар ва рўйхатга олувчиларни танлаб олиш туманлар ва шаҳарлар ҳокимликлари томонидан давлат статистикасининг ҳудудий органлари билан биргаликда шартнома асосида ташкил этилади, зарур ҳолларда, бошқа тоифадаги шахслар ҳам, улар аҳоли рўйхатини ўтказишга тайёргарлик кўриш ва/ёки уни ўтказишда иштирок этишга рози бўлган тақдирда, бу жараёнга жалб қилиниши мумкин.Вақтинчалик жалб этиладиган ходимларга исмлари ёзилган нишонлар (гувоҳномалар) берилади.Бунда ходимнинг яшаш жойи текширилаётган аҳоли пунктига қатнаш учун қулай бўлиши керак.
Вилоят прокурори, 2-сектор раҳбари Жаҳонгир Ҳатамов Тўрақўрғонда ҳоким ёрдамчилари фаолиятини ўрганди
Тумандаги 67 та маҳаллада фаолият бошлаган ҳоким ёрдамчилари 42771 та хонадонни ҳатловдан ўтказишга киришган бўлиб, бугунги қадар 3765 таси ўрганилди ва сўровнома асосида маълумотлари шакллантирилди.
Вилоят прокурори туман ҳокими Зулайҳо Маҳкамова ҳамроҳлигида Бураматут маҳалласида ҳоким ёрдамчиси Ўктамжон Бойбобоев билан суҳбатда бўлди. Бу ерда 547 та хонадон бўлиб, оилаларнинг аксарияти боғдорчилик, кўчатчилик билан машғул. Шу билан бирга паррандачилик, асаларичилик, ошланган теридан камарлар тайёрлаш бўйича илғор тадбиркорлар бор. Уларнинг тажрибаси ишсиз аҳоли ўртасида тарғибот қилиняпти, мақсад ўзини ўзи банд қилувчилар сонини кўпайтириш.
Жаҳонгир Ҳатамов мазкур маҳаллада яшовчи Нурмуҳаммад Зокиров хонадонидаги йилига 30 миллион сўм қўшимча даромад манбаи сифатида йўлга қўйилган иссиқхонани бориб кўрди. Оила иссиқхонадан йилига уч марта ҳосил олишади, чорва ҳайвонлари боқишаётгани учун маҳаллий ўғит томорқанинг самарадорлигини оширяпти.
Ўрда маҳалласидаги ҳоким ёрдамчиси Мақсуджон Усмонов ўзи тадбиркор бўлгани учун аҳоли билан ишлашни дадил бошлаган. 150 дан ортиқ хонадон эгаларининг турмуш тарзи, қизиқишлари, муаммоларини ўрганиб, керакли тавсияларни берди. Айниқса, ажратиладиган кредит ва субсидиялардан самарали фойдаланиш йўл-йўриқларини тушунтира билмоқда.
Вилоят прокурори ҳоким ёрдамчиларига Президент вакиллари сифатида астойдил, ғайрат ва маҳорат билан ишлаш лозимлигини яна бир бор уқтириб ўтди.
бунинг учун улар маҳалланинг энг яқин кўмакчисига айланиши зарур
Маълумки, Ўзбекистон Республикаси Президентининг “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчиларини фаолиятини ташкил этиш тўғрисида”ги Қарорига кўра, ҳар бир маҳаллада шундай лавозимлар жорий этилди.
Хўш, уларнинг қандай вазифа ва ваколатлари бор? Гулқишлоқ маҳалласида ташкилланган семинар шу мавзуга бағишланди. Унда туман ҳокими Зулайҳо Маҳкамова, сектор раҳбарлари, Ўзбекистон Республикаси Президентининг тумандаги Халқ қабулхонаси мудири Лазизбек Собиров иштирок этишди.
Туман раҳбари таъкидлаб ўтганидек, кейинги йилларда мамлакатимизда маҳалла тизимига алоҳида эътибор қаратилди. Биргина туман миқёсида 40 дан ортиқ МФЙ бинолари янгиланди, зарур жиҳозлар ажратилди. Аҳолининг турмуш тарзи яхшиланиши учун катта маблағлар йўналтирилди. Янги ташкил этилган ҳоким ёрдамчилари эса худудда иқтисодий масалаларни адолатли ҳал этилишида асосий ўрин тутади. “Хонадонбай” сўровлар ўтказиш орқали маҳалланинг ижтимоий-иқтисодий ривожланиш “портрети”ни ишлаб чиқиш, маҳалланинг ихтисослашуви ва ўсиш нуқталаридан келиб чиққан ҳолда оилавий тадбиркорликни ривожлантириш чораларини кўриш, ишсиз аҳолини касб-ҳунарга ўқитиш, ишга жойлашиш истагини билдирганларнинг бандлигини таъминлаш ва аҳолини ўзини ўзи банд қилишга кўмаклашиш каби бир қатор вазифалари белгиланган.
Гулқишлоқ маҳалласига бириктирилган икки ҳоким ёрдамчилари фаолияти мисолида амалга оширилиши лозим ишлар кўлами айтиб ўтилди.
Тўрақўрғонда “Ҳоким ёрдамчиси инсон қадри ва фаровон ҳаёт учун” ҳамда “Тўрақўрғонни камбағаллик ва ишсизликдан ҳоли худудга айлантирамиз” шиорлари остида ҳаракат бошланди. Унинг дастлабки самараси яқин кунларда намоён бўлади, албатта.
