Сўнгги янгиликлар
Янгиликлар
Тўрақўрғон тажрибаси: қишлоқ хўжалиги юмушлари ҳар йилгидан бир ой олдин бошланди
Ер юзидаги иқлим ўзгариши аввало она табиатда ўз аксини беради. Шунинг учун дала ишларини одатдагидай март ойида эмас, бугундан бошлаш тақозо этилмоқда.
Тўрақўрғон туманида вилоятда биринчи бўлиб ғалла парваришини кучайтириш, пахта экиладиган майдонларни тайёрлаш бўйича баҳорги ишлар бошлаб юборилди.
Шу муносабат билан вилоят ҳокимининг қишлоқ хўжалиги масалалари бўйича ўринбосари Анваржон Ҳакимов туманда бўлиб, фермер хўжаликлари раҳбарларига энг долзарб юмушларни амалга ошириш бўйича тавсиялар берди.
-Энг аввало, ғаллага чилла сувини бериш, қўшимча озиқлантиришни жадаллаштириш керак,-деди Анваржон Ҳакимов.- барча хўжаликларда “Сувчилар уйи”ни ташкил этиш, уларга тунги суғоришда ишлашлари учун барча шароитни яратиб бериш керак.
Бу йил сув танқислиги кузатилиши эҳтимоли юқори. Шуни ҳисобга олиб ғаллачиликда 10 фоиз, пахтачиликда 30 фоиз майдонлар томчилатиб, ёмғирлатиб суғоришга мослаштирилади. Шунингдек, Президент кўрсатмалари билан эҳтиёжманд, ишсиз фуқароларга бериладиган ерлар ўрнини дала четларидан ер қўшиш ҳисобига тўлдириш, ҳосилдорликни ғаллачиликда 100, пахтачиликда камида 60 центнерга етказиш зарур. Бунинг барча имкониятлари етарли. “Яшил макон” умуммиллий лойиҳасида фермерлар фаол иштирок этиб, ҳар бирлари 10 минг тупдан мевали, манзарали ва ток кўчатларини экиши талаб этилади.
Вилоят ҳокимининг қишлоқ хўжалиги бўйича оқсоқоллар гуруҳи раҳбари Мўминжон Абдураҳмонов, туман ҳокими Зулайҳо Маҳкамовалар ҳам юқоридаги вазифалар юзасидан ўз тавсияларини беришди.
Муҳим мавзулардаги ҳисоботлар тингланмоқда
Сессия кун тартибидаги биринчи масала бўйича 2-сектор раҳбари, туман прокурори Элёрбек Талабоев, 3-сектор раҳбари, ИИБ бошлиғи Мақсадбек Хасанов, 4-сектор раҳбари, туман ДСИ раҳбари Шоҳруҳбек Азбеков ҳам ҳисоботларини тақдим этишди.
Шу билан бирга Тўрақўрғон туманида 2022 йилда хизматларни ривожлантириш Дастурини тасдиқлаш тўғрисида туман ҳокимининг биринчи ўринбосари Элёрбек Турғуновнинг, “Яшил макон” умуммиллий ҳаракати доирасида туманда амалга оширилган ишлар ҳамда келгусидаги режалар тўғрисида туман ҳокимининг ўринбосари Акмалжон Тўраевнинг, 2021 йилда жамоатчилик фикри асосида шакллантирилган тадбирларни молиялаштиришга йўналтирилган маблағлар ҳисоботи тўғрисида туман молия бўлими мудири Умиджон Аҳмедходжаевнинг, Жиноят ишлари бўйича туман судининг 2021 йил давомида одилона судловни амалга ошириш борасидаги ишлари тўғрисида ЖИБ туман суди раиси О. Сиддиқовнинг, Тўрақўрғон тумани адлия бўлими бошлиғи Фароғат Раззоқованинг 2021 йил тўртинчи чораги давомида норма ижодкорлиги ва ҳуқуқни қўллаш амалиётини ўрганиш натижалари тўғрисидаги ахборотини ҳам тинглаш режалаштирилган.
Депутатлар фаоллигини ошириш зарур
Сессияда айтиб ўтилганидек, туманда эришилаётган ютуқлар қаторида ҳали амалга оширилиши лозим вазифалар, имкониятлар етарли. Бунда депутатларнинг ҳам фаоллиги зарур. Улар жойларда тарғибот ишларини юритиб, жиноятчиликни камайтириш, нотинч оилалар билан шуғулланиш, оқибат эмас, сабаб билан курашишда ташаббускор бўлишлари керак.
Туман ҳокими, шунингдек, Президентимиз бошлаб берган халқчил, одилона сиёсатни қўллаб-қувватлаб, аҳил-иноқликда халқни рози қилиш йўлида барчани фаолликка чорлади.
Сессияда кўриб чиқилган масалалар юзасидан қарорлар қабул қилинди. Шу билан Халқ депутатлари туман кенгашининг 32-сессияси ўз ишини тамомлади.
“Очиқ бюджет” –ошкоралик, шаффофлик, ҳамжиҳатлик, фаоллик демакдир
деди Халқ депутатлари туман кенгашининг сессиясида туман молия бўлими мудири Умиджон Ахмедходжаев.
Президентимизнинг тегишли Қарорларига кўра, Тўрақўрғон тумани ҳокимлиги қошида “Фуқаролар ташаббуси жамғармаси” ташкил этилган ва унга туман маҳаллий бюджетининг йил бошига шаклланган эркин қолдиқ ҳамда чораклар бўйича даромадларни ортиғи билан бажарилган қисми ҳисобидан ўтган 2021 йилда жами 1 миллиард 240,6 миллион сўм ўтказилиб, қўшимча 500 миллион ажратилди ва жами 1 миллиард 740,6 миллион сўм маблағ шакллантирилди.
“Очиқ бюджет” ахборот порталида фуқаролар томонидан келиб тушган 172 та лойиҳадан 7 таси электрон овоз орқали ғолиб деб топилди ва тумандаги қабристонлар деворини тўсиқ билан ўраш, Янгиобод ҚВПни таъмирлаш, 24-МТТ гуруҳлари хонасига конденционер ўрнатиш, 17-ДИМИга маркерли доска ва проекторлар олиш, 14-МТТни таъмирлаш, Ёртепа ва Туркистон маҳаллаларининг ички кўчаларини асфальтлашга маблағ ажратилди.
Жорий 2022 йилда ҳам “Очиқ бюджет”да овоз тўплаш, энг муаммоли масалаларни ҳал этилишига қарийб 6,5 миллиард сўм маблағ ажратилиши режалаштирилган. Овоз беришнинг дастлабки чорак учун муддати 20 феврал этиб белгиланган. Ҳозиргача 93 та таклиф келиб тушди ва бу жараён давом этяпти.
Тўрақўрғонда яна бир маҳалла замонавий биносига эга бўлди
3457 нафар аҳоли яшайдиган Озод маҳалласи саховатпеша соҳибкор, деҳқону тадбиркорлари билан машҳур. Шу ерда яшовчи ишбилармон йигит Ҳамидулло Қодиров 210 миллион сўм маблағ сарфлаб, маҳалла учун давлат –хусусий шерикчилик асосида мўъжазгина янги бино қуриб берди.
Унинг очилиш маросимида сектор раҳбарлари, нуронийлар, ёшлар вакиллари иштирок этишди. Туман ҳокими Зулайҳо Маҳкамова таъкидлаб ўтганидек, маҳалла бинолари мустаҳкам ва файзли бўлса, бу жойда Ватанни асраш, миллий қадриятлар, меҳр-оқибат, оилалар тотувлиги, халққа хизмат қилиш каби эзгу ғоялар жамланади ва тарбия ўчоғи сифатида хизмат қилади.
“Маҳалла” жамоат фонди вилоят бўлими томонидан берилган замонавий жиҳозлар, туман ҳокимлиги туҳфа этган 150 доналик китоб жамланмалари янги бинога кўрмана бўлди.
-Наврўз байрамигача яна учта маҳалла фуқаролар йиғинида шундай очилиш маросимларини ўтказамиз,-дейди Маҳалла ва оилани қўллаб-қувватлаш туман бўлими раҳбари Шерзоджон Собиров.
Тадбирдан сўнг маҳалла ёшлари ўзаро футбол бўйича мусобақа ташкилладилар.
Мактаб таълими: вазифалар, талаб ва таклифлар уйғунлиги самарадорлиги сари
Президент Шавкат Мирзиёев раислигида мактаб таълимини ривожлантириш масалалари юзасидан видеоселектор йиғилишида таълим сифатини мутлақо янги босқичга олиб чиқиш бўйича катта ислоҳотлар бошланиши билдирилди.
-Таълим-тарбия – бу бизнинг келажагимиз, ҳаёт-мамот масаласи. Шу боис, бу соҳадаги ислоҳотларни кечиктиришга ҳаққимиз йўқ.Қанчалик мураккаб бўлмасин, мактаб таълимида пойдеворни бугундан мустаҳкам қўйишимиз керак,-деди Юртбошимиз.
Туман ҳокимлигининг мажлислар залида шу мавзуга бағишланган мулоқот бўлиб ўтди. Унда туман ҳокими Зулайҳо Маҳкамова, айрим умумтаълим мактаблари директорлари, фаол муаллимлар, соҳа фахрийлари иштирок этишди.
Айтиб ўтилганидек, мактаб таълимини ислоҳ қилиш кенгашлари тузилиб, республика кенгашига шахсан Президентимизнинг ўзлари, туман ва вилоят кенгашларига эса ҳокимлар бош бўлади.
Йиғилишда туман халқ таълими бўлими мудири Файзулло Бозоров таълим муассасалари фаолияти ҳақида ахборот берди. Муваффақиятлар йўқ эмас, бор, аммо, фарзандлар келажагининг илдизи мактабга бориб тақаларкан, бугун янгиликларга интилиб, касбига садоқат билан ишламаган ўқитувчи билан кўзланган натижаларга эришиб бўлмайди.
1-умумтаълим мактаби ўқитувчиси Лобархон Рустамова, 37-мактабдан Манзура Каримова, 17-ДИМИ директори Олимжон Банноев, 25-мактаб директори Баҳодир Исроилов, 8-мактаб муаллимаси Саида Одилова ва бошқалар томонидан мактаб таълимини ривожлантириш бўйича жўяли таклифлар билдирилди. Жумладан, бошланғич синфлар учун куни узайтирилган гуруҳлар ташкил этиш, мусиқа фани дарс соатларини кўпайтириш, тарбиявий сабоқларни миллий қадриятларни уйғунлаштирган ҳолда бериш, мумтоз адабиётимизни чуқурроқ ўқиш ва ўрганиш, юқори синф ўқувчиларини қизиқишларига қараб табақалаштирилган гуруҳларга ажратиш масалалари илгари сурилди ва ушбу таклифлар вазирликка ҳавола этилади.
Йиғилишда вазифалар ижросини таъминлаш бўйича Тўрақўрғон тажрибасини яратишга келишиб олинди.
