Сўнгги янгиликлар
Янгиликлар
Мазкур шиор остида вилоятимизда Президентимизнинг 2024 йилги Наврўз умумхалқ байрамига тайёргарлик кўриш ва уни ўтказиш тўғрисидаги Қарори ижроси доирасида маданий-маърифий тарғибот тадбирлари ташкил этилмоқда. Унда юртимизнинг ривожланиши, гуллаб-яшнаши йўлида, шунингдек, халқимиз хизматида камарбаста бўлиб келаётган, спорт, мусиқа ва фан олимпиадаларида мамлакатимиз байроғини юксак чўққиларга олиб чиқаётган фарзандларни тарбиялаган мўътабар оналарни улуғлашга алоҳида эътибор қаратиляпти.
Тўрақўрғон туманидаги 27-умумтаълим мактабида ўтказилган ана шундай тадбирда Ўзбекистонда хизмат кўрсатган артист, Муқимий номли Ўзбек давлат драма театри актёри Турғун Бекназаров, Ўзбекистон Ёзувчилар уюшмаси аъзоси, Республика маърифат-тарғиботчилар жамияти аъзоси Зикрилла Неъматов иштирок этишди. Ундан аввал эса Қатағон қурбонлари ва Ибрат музейи экспонатлари билан танишдилар.
Республика маънавият-маърифат маркази вилоят бўлими раҳбари Мусохон Аппоқов, Ёзувчилар уюшмаси вилоят бўлими раиси, шоир Зиёвиддин Мансуровларнинг юрт ардоғи, шукроналик, ота-онага ҳурмат мазмунидаги мулоҳазалари, пойтахтдан келган меҳмонларнинг чиқишларини нуронийлар, оналар, ёшлар вакиллари мамнуният билан тингладилар. Иқтидорли ўқувчилар куй ва рақслар билан даврага байрам тароватини улашдилар.
Тадбирда фаол ёшлар ҳамда уларнинг оналарига туман маънавият бўлинмасининг Ташаккурнома ва эсдалик совғалари топширилди.
Ҳурматли тўрақўрғонликлар ва туманимиз меҳмонлари!
Сизларни эртага, 19 март куни туман марказида бўлиб ўтадиган Наврўз байрами тадбирларига таклиф этамиз.
Ундан турли кўргазмалар, бадиий дастурлар, беллашувлар ўрин олган. Шунингдек, ош, сумалак тарқатилади. Иқтидорли санъаткорлар энг сара қўшиқларини тақдим этадилар.
Исҳоқхон Ибрат мажмуаси олдида соат 10.00 да барчангизни кутиб қоламиз.
Ташкилий қўмита.
Китоб – қалб чироғи, тафаккур қаноти. Айниқса, босма китобдан таралаётган ва электрон нашрдан топиб бўлмайдиган ўзига хос ёқимли ҳидни туйиб, варақлаш асносида мўъжизавий саҳифаларнинг сирли шитирлашидан кўнгил чексиз завққа тўлган ҳолда, китоб мутолаа қилиш, унинг мазмуни ҳақида бошқалар билан фикрлашишнинг ҳузур-ҳаловати тамоман ўзгачадир.
Косонсой тумани "Тагижар" маҳалласида жойлашган "Эшонбобо" жомъе масжиди имом-хатиби Ибодиллохон Усмонов томонидан илмни рағбатлантирадиган, ёшлар маънавиятини юксалтиришга улкан ҳисса қўшадиган ташаббус илгари сурилди. Яъни ҳудуддаги 35,36 ва 41-мактабларга 2000 дан зиёд илмий ва бадиий адабиётлар тақдим этилди.
Китобларни қабул қилиб олган устоз ва ўқувчилар ташаббускорларга миннатдорчилик билдириб, бу китоблар ёшлар учун айни муддао бўлганини айтиб, уларни албатта ўқиб чиқишларини билдирдилар.
Барчани мана шундай хайрли ташаббусларга чорлаймиз. Зеро, илм қадрланган, эъзозланган юрт - буюк юрт.
Тўрақўрғон тумани ҳокимининг жисмоний ва юридик шахслар учун оммавий қабули Қодиробод маҳалласи биносида бўлиб ўтди. Мурожаатларни ҳоким ўринбосари Нозима Баҳриддинова тинглади.
Гулқишлоқ маҳалласида яшовчи Наргиза Абдусаломова фарзандини даволатиш, Катта қурамадан келган Дилфуза Азимова фарзандини операция қилдириш, Ўзбекистон МФЙда яшовчи Дилдора Мамадалиева иш билан банд бўлиш учун печ олиш масалаларида ёрдам сўрашди. Ушбу мурожаатлар илгари ҳам йўллангани учун назоратда эканлиги билдирилди.
Қодиробод маҳалласидан чиққан Паҳриддин Нишонов бир гуруҳ қишлоқдошлари билан ер майдонларига қўйилган жаримани бекор қилинишини сўрашди. Бу масала ўрганиб чиқиладиган бўлди.
Қабул давомида, шунингдек, йўл бўйига ток экиш, субсидияга чок машина олиш, оилавий масалаларда ҳам мурожаатлар бўлди.
#ҳоким_ва_ёшлар
Тўрақўрғон тумани ҳокими Аҳрорбек Мансуровнинг навбатдаги учрашуви Қодиробод маҳалласи ёшлари ҳузурида ўтказилди.
Туман раҳбари бундай қабулларда иқтидорли, олий маълумотли ёшларни алоҳида эътиборга олади. Ака-ука Жалолдин ва Камолдин Исмоиловлар ишга жойлашишда ёрдам сўрашди ва уларга керакли йўл-йўриқлар берилди.
Зуҳриддин Абдулбоқиев субсидияга инкубаторий, Одина Фазлиддинова тикув машинаси, Сайёра Абдураҳмонова тиббий ёрдам масаласида мурожаат этишди. Бу масалалар ҳам назоратга олиниб, ижобий ҳал бўлишига кўмаклашилади