Сўнгги янгиликлар
Янгиликлар
#Тайинлов
Тўрақўрғон тумани халқ таълими бўлимига мудир тайинланди
Ўзбекистон Республикаси Халқ таълими вазирининг буйруғи ҳамда Тўрақўрғон тумани ҳокимининг тавсиясига биноан, Тўхтаназаров Носиржон Абдуғаппорович туман халқ таълими бўлими мудири этиб тайинланди.
Н. Тўхтаназаров 1975 йилда Тўрақўрғон тумани туғилган, Наманган давлат университетини тамомлаган, мутахассислиги математика фани ўқитувчиси. Меҳнат фаолиятини 1997-2001 йилларда Тўрақўрғон агроиқтисодиёт коллежи информатика фани ўқитувчисиликдан бошлаб, сўнгра тумандаги саноат, транспорт касб-ҳунар коллежи маънавият ва маърифат ишлари бўйича директор ўринбосари, директори, 2017-2021йилларда туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари, тайинловга қадар эса Тўрақўрғон тумани 2-сон касб-ҳунар мактаби директори вазифасида ишлаган.
Тўрақўрғонда “Маънавият ва ёшлар маркази" фойдаланишга топширилди
Истиқлол байрами арафасида Тўрақўрғон туманида 30 дан ортиқ ижтимоий объектлар, тадбиркорлик субъектларининг очилиш маросимлари ўтказиляпти. Бугун ана шулардан яна бири “Маънавият ва ёшлар маркази" туман аҳолисига, ёшларга тортиқ қилинди.
Тадбиркор Зиёдбек Соадатов бошчилигида давлат хусусий шерикчилик асосида бу жойда кенг кўламли қурилиш ва ободонлаштириш ишлари рўёбга чиқарилди.
Умумий ер майдони 1,60 гектардан иборат мазкур мажмуадан соғломлаштириш ва дам олиш маскани, амфитеатр, кутубхона, Ёшлар маркази ўрин олиши лойиҳалаштирилган. Умумий ҳисобда 8,8 миллиард сўмдан ортиқ маблағ сарфлаш кўзда тутилган.
Очилиш маросимида сўз олган Республика Маънавият ва маърифат маркази вилоят бўлими раҳбари Мусохон Оппоқов, Ёшлар ишлари агентлиги вилоят бўлими раиси Бахтиёр Мирзатов, Тўрақўрғон тумани ҳокими Аҳроржон Мансуров айтиб ўтишганидек, муҳтарам Президентимиз ташаббуслари билан юртимизда маънавият ва ёшлар масаласи давлат сиёсати даражасига кўтарилган. Дарҳақиқат, маънавияти мустаҳкам, ёшлари содиқ ва интилувчан халққа ҳеч қандай ёвуз куч тажовуз қилолмайди. Шу маънода бугун эгаларига топширилаётган маскан ҳам бу борада ўзига хос қадриятлар кошонаси бўлиши шубҳасиз.
Тўрақўрғонда “Янги Ўзбекистонда эл азиз, инсон азиз” шиори остида катта байрам тадбири бўлиб ўтди
Муҳтарам Президентимизнинг 2022 йил 1 августда имзолаган “Ўзбекистон Республикаси давлат мустақиллигининг 31 йиллик байрамига тайёргарлик кўриш ва уни ўтказиш тўғрисида”ги Қарорлари ижросини туманда тўла ва сўзсиз таъминлаш юзасидан изчил иш олиб борилди. Қарорда алоҳида таъкидлаб ўтилганидек, сўнгги йилларда, дунёда коронавирус пандемияси ва иқтисодий инқироз, кескин рақобат, турли қарама-қаршилик ва зиддиятлар туфайли юзага келган ғоят оғир ва мураккаб вазиятда мард ва олижаноб халқимизнинг фидокорона меҳнати билан Янги Ўзбекистонни барпо этиш ва уни жаҳонга тараннум қилиш бўйича муҳим натижаларни қўлга киритаётганимиз, бу ютуқлар халқаро жамоатчилик томонидан эътироф этилаётгани, энг асосийси, ватандошларимизнинг онгу тафаккури, дунёқараши ўзгариб, улар ислоҳотлар самарасини кундалик ҳаётида ҳис қилиб яшаётганини алоҳида таъкидлаш зарур.
Тўрақўрғон аҳлини шонли байрам билан қутлаган туман ҳокими Аҳроржон Мансуров таъкидлаб ўтганидек, мустақиллигимизнинг 31 йиллиги нишонланаётган шу кунларда туманимиз бўйича 30 дан зиёд ижтимоий ва инфратузилма объектлари фойдаланишга топширилмоқда. Умуман, бугун туманимизнинг қайси соҳа ва йўналишларига назар ташламанг, фидойилик билан қилинаётган меҳнат, изланиш ва янгиланишларга гувоҳ бўласиз.
Истиқлол байрамининг жамиятимизда меҳр-оқибат ва ҳамжиҳатлик, инсонийлик, Ватанни асраш ва улуғлаш, бағрикенглик ва бунёдкорлик, хайр-саховат муҳитининг шаклланишида, айниқса, ёшларимизни миллий анъаналаримизга садоқат ва умуминсоний қадриятларга ҳурмат руҳида камол топтиришдаги аҳамияти беқиёсдир. Байрам тадбирида туманнинг маданият ва санъат соҳаси вакиллари, Ўзбекистонда хизмат кўрсатган артист Яҳёбек Мўминов, хушовоз хонандалар Ғайрат Усмонов, Жалолиддин Усмоновлар энг сара қўшиқ ва рақслари билан даврага шукуҳ бағишладилар.
Истиқлол айёми тадбирлари ҳудудларда давом этмоқда.
Тўрақўрғон туманида туғруқхона комплекси фойдаланишга топширилди
“Инсон қадри” тамойили асосида тиббиёт соҳасида рўй бераётган ислоҳотлар юртимизнинг барча ҳудудлари қаторида Тўрақўрғон тумани ҳаётида янада яққолроқ намоён бўлмоқда. Инвестиция дастури асосида реконструкция қилиниб, фойдаланишга топширилган 110 ўринли туғруқхона фикримизнинг яққол мисолидир.
16 миллиард сўмдан ортиқ маблағ харажат қилинган ва «Бунёдкор Мубошер» МЧЖ томонидан бутунлай ўзгача қиёфага келтирилган муассасада туғруқни қабул қилиш, уни муваффақиятли амалга ошириш, она ва чақалоқ соғлиғини муҳофаза қилиш учун барча шароитлар яратилган. 6 та туғруқ зали, 2 та операция хоналари замонавий жиҳозланган. Шунингдек, палаталар ҳам талаблар даражасидаги жиҳоз ва қурилмалар билан таъминланган.
Инсон азиз Ўзбекистонимизнинг Давлат мустақиллигига эришган қутлуғ санаси олдидан фойдаланишга топширилган мажмуанинг очилиш маросимида вилоят ҳокими Шавкатжон Абдуразаков иштирок этди.
Брифинг
Коррупция ҳолатларини камайтириш учун халқимизнинг ҳуқуқий саводхонлиги янада ошиши керак
Тўрақўрғон тумани ҳокимлиги Ахборот хизмати томонидан коррупцияга қарши курашиш бўйича туманда амалга оширилаётган ишлар юзасидан брифинг бўлиб ўтди.
Мавзу юзасидан туман адлия бўлими бошлиғи Фароғат Раззоқова маълумот берар экан, мамлакатимизда коррупциявий ҳолатларнинг ҳамда давлат ташкилотларига мурожаат пайтида фуқаролар сарсон бўлишларининг олдини олиш мақсадида кўплаб ишлар қилинганини давлат хизматлари маркази мисолида таҳлил қилиб берди. Шунингдек, юридик марказлар ташкил этилиб, аҳолининг ҳуқуқий онгини юксалтириш, давлат ташкилотларида юридик хизмат кўрсатиш сифатини оширишга алоҳида эътибор қаратилмоқда.
Туманимизда ҳам айни шундай хизматлар адлия бўлимига таркибига ўтказилди ва улар бир бинога жам қилинди. Айни пайтда биргина давлат хизматлари маркази орқали 176 турдаги хизматлар кўрсатилмоқда.
Журналист ва блогерлар адлия бўлимига қарашли мазкур хизмат турлари, замонавий бинода аҳоли учун яратилган қулайликлар билан яқиндан танишдилар.
Сўнгра ўзаро мулоқот бўлди. Фароғат Раззоқова бўлим фаолияти ҳақида батафил гапириб берди. Коррупциявий ҳолатларнинг олдини олиш чораларига тўхталди. Айниқса, фуқароларнинг бирор ноқонуний ҳолат бўйича мурожаатларини тўғридан-тўғри қабул қилувчи “Ишонч телефонлари” жорий этилгани барчага манзур бўлаётганини алоҳида таъкидлади.
Давлат хизматлари маркази директори Ғуломжон Қодиров ҳамда юридик марказ раҳбари Ўткирбек Ҳошимовлар ҳам мамлакатимизда таниш-билишчилик, пора олди-бердиси сингари аянчли иллатларни бартараф этиш йўлида олиб борилаётган ишларга тўхталдилар. Бу борада марказларда яратилган имкониятлар хусусида гапирилди.
Брифинг иштирокчилари мутахассисларга кўпчиликни қизиқтирган масалалар юзасидан саволлар бердилар ва тегишли жавоблар олинди.
