Янгиликлар
#Хушхабар
ЗАФАР МУБОРАК, НАМАНГАНЛИК ҒАЛЛАКОРЛАР!
Вилоятимизда 2025 йил қишлоқ хўжалиги соҳаси учун баракали келмоқда. Деҳқончилик ҳандалаги ҳисобланган пилла топшириш режаси уддаланиши ортидан ғаллакорларимиз ҳам зафар маррасини забт этдилар.
Йил бошидан қилинган меҳнат ўз самарасини берди: Давлат қабул омборларига бугунги кунга 198 минг 739 тонна сара дон топширилиб, белгиланган шартномавий режа 100,1 фоизга бажарилди.
Вилоятда ўртача ҳосилдорлик 82 центнерни ташкил этмоқда.Катта хирмонга режани пешқадамлардан бўлиб бажарган Мингбулоқ, Учқўрғон, Поп, Тўрақўрғон, Чуст, Чортоқ, Косонсой, Наманган туманлари ғаллакорлари муносиб улуш қўшдилар..Жорий йилги ғалла ҳосилини етиштиришда бир қатор фермерларимиз юқори натижага эришиб, гектаридан 90-100 центнердан ғалла олишга эришдилар. Жумладан, Мингбулоқ туманидаги “Яхши ният”, Учқўрғон туманидаги “Ботиржон Бобирбек”, Поп туманидаги “Зиёрат Поп”, Тўрақўрғон туманидаги “Зумрад Ибрат”, Чуст туманидаги “Юсубжон хожи Избосаров”, Чортоқ туманидаги “Бувабой Робахон Файзи”, Наманган туманидаги “Зардўст замин зилол”, Норин туманидаги “Ширин Хасан Зухра”, Уйчи туманидаги “Барногул зиё файз” фермер хўжаликлари ва Косонсой туманидаги “Янгиагрокластер баракаси” МЧЖ лар кўрсатган самарадорликни алоҳида эътироф этиш лозим.
Умуман, бу улкан ғалабада қишлоқ хўжалиги соҳасида фидойи меҳнат қилаётган барча-барчанинг муносиб улуши бор.
Яна бир бор зафар муборак бўлсин, Наманган вилоятининг лафзи ҳалол ғаллакорлари!
Ёшларнинг бўш вақтини мазмунли ташкил этиш ва бунда маҳалла етакчилари билан таълим-тарбия муассасалари педагоглари ҳамкорлигини кучайтириш лозим.
Бу ҳақда вилоят ҳокими ўринбосари Отабек Бозоров Тўрақўрғон тумани ҳокимлигида умумтаълим мактаблари директорлари ҳамда МФЙ ёшлар етакчилари иштирокидаги тадбирда батафсил гапирди.
Айниқса, «Долзарб 90 кун» давомида ўзаро ҳамжиҳатликдаги тадбирлар изчиллигини таъминлаш, инновацион технологияларга асосланган қизиқарли тўгараклар жорий этиб, уларга ўғил-қизларни иложи борича кўпроқ жалб этиш зарур.
Энг муҳим талаблардан бири, кутубхоналар, спорт зал ва ҳожатхоналарни таъмирлаш, уларни гигиеник воситалар билан таъминлашга алоҳида эътибор қаратиш кераклиги уқтирилди.
Йиғилишда Ёшлар ишлари агентлиги вилоят бошқармаси бошлиғи ўринбосари Алишер Акбаров етакчиларни фаолликка, билдирилган ишончни тўла оқлашга чақирди.
2025 ЙИЛ УЧУН ХУСУСИЙЛАШТИРИШ ДАСТУРИ ТЎҒРИСИДА
Маълумки, Ўзбекистон Республикаси Президентининг 2025 йил 21 апрел куни “2025 йил учун хусусийлаштириш дастури тўғрисида”ги Фармони қабул қилинди. Ушбу фармонни қабул қилишдан кўзданган асосий мақсад 30 триллион сўмлик давлат активлари ва ер участкаларини сотиш ва камида 10 триллион сўм тушумни таъминлаш, давлат ва давлат иштирокидаги корхоналарга тегишли 115 та жамият устав капиталидаги улушларни, 659 та кўчмас мулк объектини ва 6,1 минг гектар ер участкаларини савдога чиқариш, дастлабки босқичда камида 30 та фойдали қазилма кон ва участкаларидан фойдаланиш ҳуқуқини савдога чиқаришт белгиланган.Фармон билан иқтисодиётда давлат иштирокини қисқартириш ва хусусий сектор улушини ошириш мақсадида 2030 йил 1 январга қадар давлат иштирокидаги корхоналарни (мудофаа ва хавфсизлик билан боғлиқ корхоналар ҳамда Ўзбекистон Республикаси Президенти қарорларида назарда тутилган ҳоллар бундан мустасно) ташкил этишга мораторий жорий этилди.Шунингдек, Фармонга асосан 2025 йил учун хусусийлаштириш дастури Наманган вилояти бўйича давлат ва давлат иштирокидаги корхоналарга тегишли 8 та жамият устав капиталидаги улушларни, 69 та кўчмас мулк объектини ва 274,4 гектар ер участкаларини савдога чиқариш режалаштирилган.
“Бекобод” маҳалласида фуқароларнинг мурожаатлари тингланди
Сайёр қабуллар – халқ билан очиқ-ошкора мулоқотнинг энг самарали усулларидан биридир. “Халқ давлат идораларига эмас, давлат идоралари халққа хизмат қилиши керак” тамойили туфайли аҳоли мурожаатлари тезкор ва самарали ечим топмоқда.
Вилоят ҳокими Шавкатжон Абдураззоқов Тўрақўрғон туманидаги ўрганишлари мобайнида Бекобод маҳалла фуқаролар йиғини биносида вилоят даражасида ҳал этилишига зарурат бўлган уй-жой таъмирлаш, тадбиркорлик фаолиятини ривожлантириш учун имтиёзли кредит олиш, уй-жой олиш, фарзандини даволатиш, МИБ фаолиятига доир мурожаатларни тинглади.
Шу жойнинг ўзида кўмак сўраган 2 нафар эҳтиёжмандга ногиронлик аравачаси ва бир нафар ҳунармандга пишириқ печи берилди.
Мактаб кутубхоналари янги адабиётлар билан бойиди
Айни пайтда Тўрақўрғон туманидаги умумий ўрта таълим мактабларида фаолият кўрсатаётган кутубхоналарда 135 минг 200 та бадиий адабиётлар мавжуд. Туман марказида бошланган эрталабки тадбирдан сўнг улар сони 6 минг 844 тага ортди. Сабаби кутубхоналарга маҳаллий бюджет маблағлари ҳисобидан 221 миллион 500 минг сўмлик китоблар - ўзбек ва жаҳон адабиёти намуналари тарқатилди.
Дастлаб туман ҳокими Шерали Қосимов Исҳоқхон Ибрат номли мажмуа олдида китобнинг инсон, айниқса, ёшлар тафаккурини бойитишидаги ўрни ҳақида гапирди. Ташкилланган «Китоб карвони» барча ҳудудларга бориши кутубхоналар жамғармасига муносиб ҳисса бўлишини алоҳида таъкидлади.
Шундан сўнг китобларни ортган автомобиллар тумандаги мактабларга йўл олди. Ўқув-тарбия муассасалари янги адабиётлар билан таъминланди.