Сўнгги янгиликлар
Янгиликлар
Халқ таълими вазири ўринбосари Тўрақўрғон туманида бўлди
Айтиш мумкинки, Исҳоқхон тўра Ибрат мажмуаси туман меҳмонлари учун муқаддас қадамжога айланган. Вазир ўринбосари Фарҳод Боқиев бу тарихчи олим, манбаашунос, еттита тилни мукаммал билган инсон номи билан аталган музейга кириб, экспонатлар ва ҳужжатлар билан танишди. Айниқса, ёшларнинг Ибрат ҳақидаги маълумотларни мукаммал билишларини юқори баҳолади.
Шундан сўнг Исҳоқхон тўра Ибрат номидаги ижод мактабида учрашув бўлиб ўтди. Унда Фарҳод Боқиев ҳамда туман ҳокими Шерали Қосимовлар ёшларни пухта билим олиб, Ватаннинг асл фарзандлари бўлишга чақиришди. Шу ерда “Жадид издошлари” кўрик-танловининг вилоят босқичига старт берилди ва ўқувчилар талқинида миллат бахти учун курашган жадид боболар сиймолари гавдалантирилди.
5-умумтаълим мактабида давомланган учрашувда ўқувчиларга яратилган шароитлар ўрганилди. “Болалар ҳаракати” мактаб сардорлар сайлови ғолибларига ишонч ёрлиқлари топширилди. Вазир ўринбосари раҳбарлигида мактаб боғига дарахт кўчатлари экилди.
Полвонларимиз Жаҳон чемпионатида энг кўп медаллар билан биринчи ўринда боришмоқда
Айни пайтда Россия федерациясининг Қозон шаҳрида белбоғли кураш бўйича катталар, ёшлар ва ўсмирлар ўртасида Жаҳон чемпионати бўлиб ўтмоқда.
Қувонарлиси, кеча 11 ноябрь куни старт олган ушбу нуфузли мусобақада эркаклар терма жамоаси бош мураббийи Шавкат Мирзақулов, аёллар терма жамоаси бош мураббийи Сергей Тхак ҳамда ёшлар терма жамоаси бош мураббийи Бахтиёр Турғунпўлатов бошчилигидаги полвонлар муносиб қатнашиб, жами 4 та олтин, 2 та кумуш ва 2 та бронза медалини қўлга киритиб, 30 та давлат спортчилари орасида умумжамоа ҳисобида фахрли биринчи ўринни эгаллади.
Бугун 12 ноябрь мусобақанинг иккинчи кунида катталар ўртасида белбоғли курашнинг классик йўналишида 8 та медаллар жамланмаси учун беллашувлар ўтказилмоқда.
Регламентга кўра, эртага ёшлар ва ўсмирлар ўртасидаги мусобақаларга старт берилади.
“Яшил макон” умуммиллий лойиҳасининг кузги мавсуми давом этмоқда
Тўрақўрғон туманида муҳтарам Президентимиз ташаббуслари билан бошланган “Яшил макон” умуммиллий лойиҳаси доирасида ўтган уч йил мобайнида 3,9 млн. дона кўчатлар экилди.
Жумладан, “Шоҳидон нурли диёри” ММТП ҳудудидаги 5,0 гектар майдонда “Яшил боғ”,Тошкент, Исвахон ва Чусткўприк маҳалласи ҳудудида 3,5 га. ер майдонида “Яшил жамоат парклари”, “Тўрақўрғон Иссиқлик Электр Станцияси”нинг ишлаши ҳисобига ҳавога тарқалаётган зарарни камайтириш мақсадида ҳудуд атрофидаги 5,0 га майдонда “Яшил белбоғ” яратилди.
Жорий йил баҳор мавсумида 642,0 минг ўрнига 759,3 минг дона кўчат экилди. Кузги мавсумда 544,6 минг дона мевали, манзарали ва бута кўчатлари ўтқазиш мақсад қилинган.
Бугун Еттикон МФЙ ҳудудидаги 1,5 га ер майдонида яна бир “Яшил боғ” бунёд бўлди. Шу муносабат билан ташкилланган тадбирда Ўзбекистон Республикаси Бош вазири ўринбосари Очилбой Раматов, вилоят ҳокимининг ўринбосари Ғофуржон Джамолов, туман ҳокими Шерали Қосимов, сектор раҳбарлари, нуронийлар, ёшлар вакиллари, ташкилот ва корхоналар жамоалари ҳозир бўлдилар.
Тадбир давомида 3,5 минг тупдан ортиқ ноёб манзарали кўчатлар экилди. Жараёнлар туманнинг барча ҳудудларида давом этмоқда.
Тўрақўрғон тумани ҳокимлиги Ахборот хизмати.
Қишлоқ хўжалигида меҳнатсиз фасл йўқ. Куз эса келгуси йил ҳосилига пухта тайёргарлик кўришнинг айни палласи
Тўрақўрғон туманидаги "Шоҳидон бургути" фермер хўжалигида ана шу вазифаларга бағишланган семинар бўлиб ўтди. Унда вилоят ҳокимининг ўринбосари Анваржон Ҳакимов, вилоят ҳокимининг оқсоқоллар гуруҳи раҳбари Мўминжон Жўраев, вилоят ўсимликлар карантини ва ҳимояси инспекцияси бошлиғи ўринбосари Алижон Жўраев, туман ҳокими Шерали Қосимов, ММТП раислари, фермерлар иштирок этишди.
Туманда кузги мавсумда такрорий экиндан бўшаган 4671 гектарни шудгорлаш, 4776 гектарга бошоқли дон экиш режалаштирилган. Семинарда айтиб ўтилганидек, бу тадбирлар қисқа муддатда якунланиши зарур. Шунингдек, яқинда Президентимиз раҳбарликларида ўтказилган селектор йиғилишидаги топшириқларга асосан ноябр-декабр ойлари учун белгиланган ички ариқларни бетонлаштириш давом эттирилади.
Тадбирда шу каби агротехник талабларни бажариш юзасидан қўшимча вазифалар ҳам тавсия этилди.
Тўрақўрғон тумани ҳокимлиги Ахборот хизмати
Бугун Халқ депутатлари Тўрақўрғон тумани кенгашининг еттинчи чақириқ биринчи сессияси бўлиб ўтди
Унда Тўрақўрғон тумани сайлов комиссияси раиси Одилжон Жўраевнинг жорий йил 27 октябрда бўлиб ўтган сайлов якунлари тўғрисидаги ахбороти тингланди.
Тадбирда халқ депутатлари Тўрақўрғон тумани кенгашига сайланган депутатларнинг партия гуруҳлари рўйхатдан ўтказилиб, кенгашнинг регламенти ва доимий комиссиялар тўғрисидаги Низоми тасдиқланди.
Шундан сўнг вилоят ҳокимлиги вакили Баҳодир Бобохонов вилоят ҳокимининг Шерали Абдуқаҳарович Косимовни Тўрақўрғон тумани ҳокими лавозимига тайинлаш тўғрисидаги қарорини ўқиб эшиттирди. Меҳнат фахрийси Ҳ. Ҳожиматов, Ўзбекистон Қаҳрамони Халчахон Мирзаевалар ушбу қарорни қўллаб-қувватлаб, ўз фикрларини билдирдилар.
Сессия давомида Шерали Косимов Тўрақўрғон туманини 2025-2029 йилларда комплекс ижтимоий-иқтисодий ривожлантириш дастури бўйича маълумотлар берди.
Халқ депутатлари Тўрақўрғон тумани кенгашининг қарори билан Шерали Абдуқаҳарович Косимов Тўрақўрғон тумани ҳокими лавозимига тасдиқланди.
Шу билан сессия ишига якун ясалди.