Янгиликлар
#тайёргарлик
Яна саноқли кунлардан сўнг халқимизнинг энг ардоқли ва боқий байрами Наврўзи оламни нишонлаймиз. Унинг асосий тадбирлари Тўрақўрғон тумани маркази – Исҳоқхон Ибрат номли мажмуа атрофида бўлиб ўтади.
Ушбу байрамни нишонлашга тайёргарлик кўриш ва ўтказиш даврида намунали жамоат тартибини сақлаш, йўл ҳаракати ҳамда ёнғин хавфсизлигини таъминлаш энг муҳим масалалардан ҳисобланади.
Сайл тарзида ўтадиган байрам тадбиридан тумандаги ташкилот ва корхоналар жамоаларининг кўргазмалари, бадиий ва спорт чиқишлари ҳам ўрин олиши бўйича чора-тадбирлар белгиланган.
Шу мақсадда мутасаддилар иштирокида байрамолди тайёргарлик бўйича кенгашиб олинди ва туман ҳокими Ш. Қосимов томонидан тегишли тавсиялар берилди.
Тўрақўрғон тумани ҳокими Шерали Қосимовнинг ёшлар билан очиқ мулоқот тарзидаги учрашуви бўлиб ўтди
33-мактабда ташкилланган ушбу тадбирда ёшлар томонидан узрқ муддатга ер олиш, уй-жойни таъмирлаш, шартнома асосида олийгоҳдаги ўқиш тўловини тўлаб бериш, ишга жойлашиш, субсидияга тикув машинаси олиш, ёш оилага газ баллон ажратилиши каби масалаларда мурожаатлар билдирилди. Уларнинг аксариятига тезкор ечим изланиб, мутасаддиларга йўналтирилди.
Учрашувдан сўнг туман раҳбари битирувчилар билан суҳбатлашиб, ўқувчиларга фақат билим олиш билангина барча орзу-мақсадларга етиш мумкинлиги ҳақида йўл-йўриқлар кўрсатилди. Шунингдек, 50 йиллик тарихга эга, 2000 дона экспонатларни ўзида жамлаган мактабнинг тарихий музейи кўздан кечирилди.
40 йиллик муаммо ҳал этилмоқда - "Қодиробод" маҳалласидаги томорқаларга ҳам энди сув боради!
Тўрақўрғон туманида 2025 йилда “Камбағалликдан фаровонлик сари” дастури доирасида маҳаллаларда томорқа ерларини суғоришни яхшилаш бўйича Қодиробод маҳалласи танлаб олинган эди.
Бир пайтлар фақат тошлоқ, қир-адирлардан иборат бўлган Юқори Қодиробод массивида эндиликда ташкил этилган боғ-роғларни кўриб аввалги манзаралар кўпчиликнинг ёдидан ҳам кўтарилаёзган. 1984 йилда бу ҳудудга дастлабки оилалар уй қуриб кўчиб келган бўлса, ҳозирда 200 та хонадон бор.
Бироқ, йиллар давомида сув масаласи муаммо бўлиб келди. Дастур доирасида “Ахси-2” насос станциясидан 1,5 километр узунликдаги тармоқ тортиш ҳаракати бошланди. Бунинг учун 1 миллиард 800 миллион сўм маблағ ажратилди. Шунда аҳолининг жами 20 гектар майдонни эгаллаган томорқаларига ҳам оби-ҳаёт етиб боради.
"Diament коntinental” МЧЖ ишчилари томонидан шу кунларда 330 диаметрли қувурларни келтириш, уларни жойлаштириш учун ер кавлаш ишлари бошланган.
Азалдан деҳқону соҳибкорлиги билан ном қозонган қодирободликлар энди сув таъминотидан кўнгиллари хотиржам бўлиб, боғ-роғларни яшнатиш ишларига киришиб кетишди.
#муҳокама
Ҳоким ёрдамчилари маҳаллаларда давлат сиёсатини юритадиган вакил ҳисобланишади. Улар ваколатлари доирасида “Камбағалликдан фаровонлик сари” давлат дастури бўйича аҳоли бандлигини таъминлаш, янги иш ўринларини яратиш каби вазифаларни бажарадилар.
Туман ҳокими Шерали Қосимов раҳбарлигида ўтказилган таҳлилий йиғилишда ҳоким ёрдамчиларининг фаолияти ҳақида сўз борди. 2024 йил якунларига кўра, уларнинг 3 нафари “аъло”, 47 нафари “яхши” ва 17 нафари “қониқарли” ишлаганлар. Бу кўрсаткичларни янада яхшилаш мумкин. Ҳоким ёрдамчилари маҳалла драйверини ривожлантириш, микролойиҳалар ишлаб чиқиш, аҳоли томорқаларидан самарали фойдаланиш, оилавий тадбиркорлик учун ажратилган муаммоли кредитларни ундиришда фаол бўлишлари ва натижадорликка эришишлари лозим. Бу давр талабидир.
Йиғилишда кун тартибидаги масалалар бўйича қўшимча топшириқлар ҳам берилди.
#семинар
“Тўрақўрғонда плёнка остига чигит экишга ҳам, томчилатиб суғоришга ҳам вилоятда биринчилардан бўлиб киришилган. Бу тажрибани барча фермерлар қўллаши керак”
Тумандаги “Зумрад, Ибрат” фермер хўжалиги даласида шу мавзуга бағишланган семинарда вилоят ҳокими Шавкатжон Абдураззоқов иштирок этиб, юқоридаги фикрларни билдирди.
Жорий йилда туманда 3060 гектар майдонда пахта етиштириш режалаштирилган, шундан 42 та фермер хўжалигидаги 1600 гектар ерга хорижий нав жойлаштирилади. Бунинг афзаллиги эртапишар ва юқори ҳосилдорлигидир. Шунингдек, 1489 гектар пахта майдони томчилатиб, 750 гектар ғаллазор ёмғирлатиб суғоришга мослаштирилди. 2024-2025 йилларда 141 километр ички ариқларни бетонлаштириш мўлжал қилиниб, айни пайтгача 102, 7 километри уддаланди.
Семинар давомида вилоят ҳокими томонидан пахтани фақат 76х10 схемада экиш, бунда ер ҳамда кўчат сони ортиши ҳисобига қўшимча 14 фоиз самарадорликка эришиш мумкинлиги таъкидлаб ўтилди. Дала четларига мевали кўчатлар ўтқазиш, ғалла парвариши билан боғлиқ масалалар, экиш ишларига техникалар тайёргарлиги ҳам кун тартибида бўлди.
Тадбир сўнггида нуронийлар иштирокида яхши ниятлар билан чигит экишга фотиҳа берилди.