Янгиликлар
Agentlik direktori Namangan viloyatidagi xizmat safari davomida bandlik masalasiga alohida e’tibor qaratdi.
Xususan, To‘raqo‘rg‘on tumanidagi “Oqtosh tekstil” MCHJ korxonasida bo’lib, nogironligi bo‘lgan shaxslar hamda reyestrlarda turgan oilalar a’zolari bandligini ta’minlash bo‘yicha amalga oshirilgan ishlar va sharoitlar bilan tanishdi.
Mazkur korxonada jami 575 nafar fuqarolarning, shundan 124 nafar “Ijtimoiy himoya yagona reyestri” va “Kambag‘al oilalar reyestri”dagilar hamda 15 nafar nogironligi bo‘lgan shaxslarning bandligi ta’minlangan. Ushbu korxonada ishchilar uchun 1 nafar psixolog shtati ham ajratilgan.
Ташаббусли бюджетнинг 2-мавсуми якунланди
2025 йилнинг 2-мавсуми доирасида “Ташаббусли бюджет” жараёнлари вилоятимизда ҳам фаол ўтди. Маҳаллий аҳоли ташаббуслари орқали ўзини қийнаб келаётган муаммоларга ечим топиш мақсадида жами 1 968 та таклиф “Очиқ бюджет” ахборот порталига киритилди.
Бу галда вилоятдаги барча 788 та маҳалла фуқаролар йиғини қамраб олинди ва ҳар бир маҳаллада ўртача 3 та таклиф электрон тарзда жойлаштирилди.
Овоз бериш жараёнида фуқаролар юқори фаоллик кўрсатишди. Натижада дастлабки қиймати 241,9 млрд. сўм бўлган 172 та таклиф ғолиб деб топилди.
Ғолиб лойиҳалар йўналишлар кесимида қуйидагича тақсимланди:
Ички йўлларни таъмирлаш ва асфальтлаш – 181,7 млрд. сўмлик 126 та таклиф (73,3%)
Таълим муассасаларини таъмирлаш ва моддий-техника базасини ривожлантириш – 39,2 млрд. сўмлик 30 та таклиф (17,5%)
Соғлиқни сақлаш муассасаларини таъмирлаш ва моддий-техника базасини ривожлантириш – 13,8 млрд. сўмлик 11 та таклиф (6,4%)
Бошқа йўналишлардаги қонунчилик асосида белгиланган харажатлар – 6,9 млрд. сўмлик 5 та таклиф (2,9%)
Жараён аҳолининг ижтимоий фаоллиги ортиб бораётганини кўрсатмоқда. Ташаббускор фуқароларнинг фикр ва таклифлари маҳаллалардаги турмуш шароитини яхшилашда муҳим қадам бўлиб хизмат қилмоқда.
"Билимлар куни"да Тўрақўрғон туманида бирйўла иккита мактаб замонавий қиёфада фойдаланишга топширилди
Янги ўқув йилининг бошланиши Гулқишлоқ маҳалласи аҳолиси ҳамда ўқувчилар учун ўзгача кечди. Замонавий қиёфа олган 29-мактаб фойдаланишга топширилди.
Муассасанинг бундан қарийб 40 йил аввал ва ундан кейин қурилган бинолари 626 ўринга мўлжалланган бўлиб, кейинги пайтда 1360 нафар ўқувчига билим бериш учун ҳатто икки навбатда ҳам хоналар етишмасди.
Инвестиция дастурига кўра, 5 миллиард 700 миллион сўмдан ортиқ маблағ ажратилиши туфайли жорий йилда 420 ўринли қўшимча бино қурилиши ва барча ўқув хоналари замонавий ҳолга келтирилиши билан бу муаммо бартараф этилди.
Маросимда туман ҳокими Шерали Қосимов иштирок этиб, барчани қўшалоқ байрам билан табриклади. Муваффақиятлари йил сайин кўпаяётган мактаб жамоасига янада омад тилади.
“Биринчи қўнғироқ” чалиниб, ўқувчилар безатилган синф хоналарига кирдилар. Айниқса, биринчи марта мактаб партасига ўтирган ўғил-қизлар учун энг унутилмас кун бўлди.
"Билимлар куни" муносабати билан хизмат йўриқномаси ўтказилди
Эртага Тўрақўрғон туманидаги барча умумтаълим мактаблари, давлат ихтисослаштирилган махсус таълим муассасаларида янги ўқув йили бошланади.
Шу муносабати билан туман ҳокимлиги, ички ишлар бўлими, маҳалла фуқаролар йиғини масъуллари ўқувчиларнинг йўлларда хавфсиз ҳаракатланиб, мактабларига етиб келишлари, тадбирлар тартибли ўтказилиши учун амалга ошириладиган ишлар хизмат йўриқномасида белгилаб олинди.
Унда туман ҳокими Шерали Қосимов, ИИБ бошлиғи Жаҳонгир Хусайновлар зарур вазифаларга тўхталиб ўтдилар. Мактаблар олдида автомобиллар ҳаракати учун чекланган тезлик жорий этилгани эслатиб ўтилди.
Бир сўз билан ифодаланганда эртага таълим даргоҳларидаги тадбирлар чинакам байрам тусини олиши зарур, дейилди йўриқномада.
Ҳар бир байрам аҳолига қулай имкониятлар яратилиши билан янада завқли ўтади.Шулардан бири бозорлар тўкинлигини таъминлашдир. Серобчилик ўз ўрнида арзончилик демакдир.
Тўрақўрғон тумани ҳокими Шерали Қосимов ҳамда вилоят прокуратураси бўлим бошлиғи А.Насриддинов, туман прокурори ўринбосари С.Умаровлар марказий деҳқон бозорида мустақиллик байрами муносабати билан ташкил этилган озиқ-овқат ярмаркасини ҳам бориб кўрдилар.
Пештахталарни ҳар куни янги ва сифатли маҳсулотлар билан тўлдириш, фермер хўжаликларида етиштирилган полиз экинлари, гўшт, тухум кабиларни кўпроқ етказиш орқали нарх-навонинг мўътадиллигини таъминлаш топшириқлари берилди. Чунки аҳоли нафақат кундалик рўзғор, балки куз-қишга заҳира омборини тўлдиришга ҳам киришган.