Сўнгги янгиликлар
Янгиликлар
Банк муассасалари аҳоли даромадларини ошириш, камбағалликни қисқартириш, фуқароларнинг ўзини ўзи банд қилишида энг яқин кўмакчи бўлиши зарур
Кеча Президент Шавкат Мирзиёев раислигида банк хизматлари орқали маҳаллаларда камбағалликни қисқартириш бўйича жорий йилда амалга оширилган ишлар ва 2025 йил учун асосий режалар юзасидан видеоселектор йиғилиши ўтказилди. Банк хизматларининг маҳалла даражасигача туширилгани яхши натижа бераётгани қайд этилди.
2025 йил бандликни таъминлаш ва камбағалликдан чиқаришда энг муҳим ва ҳал қилувчи йил бўлади, дейилди йиғилишда. Туманларда маҳалла банкирлари фаолиятини йўлга қўйилади ва улар маҳалланинг бизнес имкониятларини ўрганади, одамлар билан гаплашиб, уларнинг ғояларини лойиҳаларга айлантиради. Аҳолини кредит олиш, қайтариш, бизнес очиш, маҳсулотини сотишга ўргатади, лойиҳаларга ҳамроҳлик қилади.
Тўрақўрғон тумани ҳокими Шерали Қосимов бугун тумандаги банк муассасалари ходимлари билан мулоқотда ана шу топшириқларга яна бир бор тўхталиб, уларни амалга ошириш механизмларини тушунтирди. Банклар маҳаллаларга бириктирилиб, ҳоким ёрдамчилари билан ижобий натижага эришиш учун ҳозирдан келгуси йил режаларини тузишлари топширилди.
Қонунларимизда яна бир муҳим янгилик
2024 йилнинг 21 ноябрида «Ўзбекистон Республикасининг айрим қонун ҳужжатларига рақамли далиллар билан ишлаш тизимини такомиллаштиришга қаратилган ўзгартириш ва қўшимчалар киритиш тўғрисида»ги Қонун қабул қилинди.
Қонун билан Жиноят-процессуал кодексига, Фуқаролик-процессуал кодексига, Иқтисодий процессуал кодексга, Маъмурий жавобгарлик тўғрисидаги кодексга ва Маъмурий суд ишларини юритиш тўғрисидаги кодексга рақамли далиллар тушунчасини, рақамли далилларни тўплаш, тақдим этиш, мустаҳкамлаш, кўздан кечириш, текшириш ва баҳолаш, уларни сақлаш, қайтариш ҳамда йўқ қилиш тартибини белгиловчи ўзгартириш ва қўшимчалар киритилди.
Ўзбекистон Республикасининг Жиноят-процессуал кодексида ҳам бир қатор ўзгаришлар акс этди, дедик. Хусусан, у 201-1-модда билан тўлдирилиб, жиноят иши доирасида гувоҳ, жабрланувчи, гумон қилинувчи, айбланувчи, судланувчи ва бошқа шахслар электрон маълумотларни ушбу маълумотларнинг кўчирма нусхасини электрон жисмдан электрон маълумотлар мавжуд бўлган бошқа электрон жисмга олиш орқали тақдим этишга ҳақли эканлиги белгиланди.
Жиноят-процессуал кодекси 204-1-модда (Электрон маълумотлар) ҳамда 204-2-модда (Рақамли далиллар) билан тўлдирилди. Шуларга асосланган ҳолда электрон маълумотлар ўзи нима, деган саволга жавоб бермоқчимиз. Демак, электрон маълумотлар электрон қурилмалардан ва ахборот тизимларидан, шунингдек ахборот технологияларидан фойдаланган ҳолда яратиладиган, ишлов бериладиган ҳамда сақланадиган маълумотлардир.
Хуллас, мазкур Қонун мамлакатимизда инсон ўзининг қонуний манфаатларини ҳимоя қилиши учун тенг имкониятлар яратишда, ишнинг ҳақиқий ҳолатларини ҳар томонлама, тўлиқ ва холисона аниқлаш орқали ҳуқуқ ва эркинликлар самарали ҳимояланишини таъминлашда биз учун дастуриламал бўлади.
Мирмуҳаммад Мирхайдаров, Наманган туманлараро маъмурий судининг судя ёрдамчиси.
Муҳаммадсодиқ Рахимов, Наманган вилоят маъмурий судининг судя катта ёрдамчиси.
Таълим-тарбия масаласи ҳамиша долзарб
Тўрақўрғон тумани ҳокими Шерали Қосимов раҳбарлигида мактабгача ва мактаб таълими бўлимига қарашли муассасалар директорлари иштирокида жорий йилда амалга оширилган ишлар ҳисоботи ва келгуси йил вазифаларига бағишланган йиғилиш бўлиб ўтди.
Дастлаб ММТБ раҳбари Эъзоза Тўрабоева эришилган натижалар юзасидан ҳисобот берди.
Муҳтарам Президентимиз раҳбарликларида шу йил 18-20 ноябр кунлари бўлиб ўтган Олий Мажлис Қонунчилик Палатаси ҳамда Олий Мажлис Сенатининг биринчи йиғилишларида барча соҳалар қатори мактаб таълимини ривожлантириш бўйича катта вазифалар белгилаб берилди. Бу вазифалар ёшларимизни маънавияти бой, ватанпарвар, юртимиз келажаги эгалари бўлиб камолга етишларига хизмат қилади, албатта.
Туман раҳбари масъулларга мактабларда давомат, ўзлаштириш, тартиб-интизом, ободонлаштириш талаб даражасида бўлиши, шунингдек, куз-қиш мавсумини кўнгилли ўтказиш учун керакли чоралар кўрилиши, 2025 йилда амалга ошириладиган ишлар юзасидан ҳар бир муассаса раҳбари ўз режа ва таклифларини тақдим этиши бўйича топшириқлар берди.
Йиғилиш давомида Миллий гвардия туман қўриқлаш бўлими бошлиғи У. Каримов, ФВБ бошлиғи Ф.Хўжамбердиевларнинг ҳам тавсиялари тингланди.
Тўрақўрғон тумани ҳокими Шерали Қосимов марказий шифохонада иссиқлик таъминоти, беморларга яратилган шароитларни ўрганди.
Ташқарида совуқ ҳукмрон бўлиб, қор ёғишни бошлади. Бундай пайтда ижтимоий соҳа объектларининг иситиш тизимида асло муаммо бўлмаслиги керак.
Туман раҳбари марказий шифохонанинг бир қатор бўлимларига кириб, ана шу масалаларни ўрганди. Беморлар ва уларнинг яқинлари билан мулоқотда бўлди.
Масъулларга маромни шундай тутиш, мавсумни кўнгилли ўтказиш учун барча чора-тадбирларни кўриш бўйича зарур топшириқлар берилди.
#бугун_қабул
Тўрақўрғон тумани ҳокимининг жисмоний ва юридик шахслар учун навбатдаги қабули бўлиб ўтди. Туман раҳбари хизмат сафарида эканлиги боис мурожаатларни унинг биринчи ўринбосари Қудратилла Соходуллаев ва туман “Халқ қабулхонаси” мудири Бекмурод Исаков биргаликда тинглашди.
Мурожаатларнинг аксарияти қиш мавсуми муаммолари билан боғлиқ. Жумладан, Узумзор маҳалласидан келган Маҳфират Аслонова кўмир олиш, чусткўприклик Мадина Турғунова уй-жой масаласи, лангарбоболик Бекзод Жумаев бир марталик моддий ёрдам сўрашди. Шунингдек, Обод маҳалласида яшовчи Саида Имомбердиева болалар нафақаси ажратилиши, Куймозордан Дилдора Миралиева турмуш ўртоғини ҳамда гулқишлоқлик Наргиза Абдусаломова фарзандини даволатишда кўмак кераклигини билдиришди.
Мурожаатлар қабул жойининг ўзида масъуллар билан кўриб чиқилди ва назоратга олинди. Қабулдан сўнг Файзиобод маҳалласида яшовчи Соҳиба Ўринбоеванинг мурожаатига кўра, унинг яшаш хонадони ўрганилди ва шароитларини яхшилаш бўйича зарур чора-тадбирлар белгиланди.