Янгиликлар
Давлатобод туманидаги "Афсоналар водийси" тематик паркида "III-Халқаро асал фестивали" ўтмоқда. Унда Тўрақўрғон тумани вакиллари ҳам иштирок этишмоқда
Таъкидлаш жоиз, бу йилги фестивалда 250 дан ортиқ маҳаллий ва хорижий асаларичилар ўз маҳсулотларини тақдим этмоқда. Улар орасида мамлакатимизнинг турли вилоятлари ва Қирғиз республикасидан келган соҳа вакиллари бор.
“Тўрақўрғон асал маркази” МЧЖ раҳбари Зафаржон Абдуллаевнинг маълум қилишича, қўшни қирғизистонлик вакиллар билан жами 4 миллион долларлик келишув имзоланди. Унга кўра, қўшни республикадан улгуржи нархда асал етказиб берилади, ўз навбатида тўрақўрғонлик асалчилар у ернинг тоғларида асалари уяларини жойлаштириб, маҳсулот етиштиришади. Бундан ташқари, қирғизистонликлар асалчиларимизга маҳорат сабоқларини бериш учун туманимизга ташриф буюрадилар.
Фестивал эртага ҳам давом этади.
Тўрақўрғонда 100 йиллик тарихга эга умумтаълим мактаби мукаммал таъмирдан чиқарилди. Тақдимот маросимида вилоят ҳокими Шавкатжон Абдураззоқов иштирок этди.
1924 йилда ташкил топган 24-умумтаълим мактаби жамоасининг аҳиллиги, эришилаётган муваффақиятлари ўрнак қилса арзирли. Улар ўтган йилларда “Ташаббусли бюджет” лойиҳаси доирасида спорт майдончаси, ўқув жиҳозлари олишган бўлса, бу йил эса яна 1 миллиард 280 миллион сўмлик лойиҳада ғолиб бўлишди ва мактабнинг ташқи қиёфаси бутунлай ўзгариб, кўркам қиёфа касб этди.
Бу ерда мактаб томорқасидан унумли фойдаланиб келинмоқда. 80 сотихда қулупной, 200 туп бодом, 100 туп ҳурмо етиштириляпти. Яқинда “EKO-schools Uzbekistan” лойиҳасига аъзо бўлиб, ғолиблар сафида 14 миллион сўмлик 1 сотихли иссиқхона қурилиши ҳам насиб этди. Булар орқали йилига 30-35 миллион сўм даромад кўриляпти.
Мукаммал таъмирдан чиқарилган муассасанинг тақдимот маросимида иштирок этган вилоят ҳокими Шавкатжон Абдураззоқов яратилган имкониятлардан унумли фойдаланиш кераклигини таъкидлади ва ушбу мактаб тажрибасини вилоят миқёсида оммалаштириш тавсиясини берди. Шу ерда маҳалла оқсоқоллари билан мулоқот ўтказилди, келгуси очиқ бюджет танловларига кўпроқ аҳоли учун энг зарур масалалар бўлган ички йўлларни ободонлаштириш ва ичимлик суви бўйича лойиҳалар таклифларини қўйиш айтиб ўтилди.
Тўрақўрғон тумани ҳокимлиги Ахборот хизмати.
🟢To’raqo’rg’on tumanida joylashgan Madaniyat markazida Ijtimoiy himoya milliy agentligi Namangan viloyati boshqarmasi tomonidan “Elga xizmat – oliy maqsad!” shiori ostida kouching tashkil etildi.
🧮Erkin va samimiy suhbat hamda oʻzaro fikrlar almashinuvi tarzida kechgan kouchingda Ijtimoiy himoya milliy agentligi viloyat boshqarmasi boshlig’i Ibrohim Xodjiyev, tuman hokimi o’rinbosari Ikromjon Parpiyev, tuman “Inson” markazi xodimlari hamda mahallalardagi aholi vakillari ishtirok etdilar.
💻Mazkur kouchingda Ijtimoiy himoya milliy agentligi tomonidan ko’rsatiladigan barcha ijtimoiy xizmatlar haqida fuqarolarimizga batafsil ma’lumotlar berildi. Shuningdek, interaktiv usulda fuqarolar bilan psixologik o’yinlar o’tkazildi.
👥O’zaro hech qanday chegaralarsiz o’tkazilgan tadbirda aholi vakillari barcha o’zlarini qiziqtirgan savollarga javob olishdi. Shuningdek, ularni yanada sifatli xizmatlarni tashkil etish borasidagi takliflari ham tinglandi.
🖋Xususan, gaz va elektr toʻlovlari uchun bir martalik kompensatsiya toʻlovlari, sanatoriylarga yoʻllanma berish tartibi, “Saxovat va koʼmak” jamgʼarmasidan yordam koʼrsatish, nogironligi boʼlgan shaxslarni reabilitatsiya qilishning texnik vositalari va protez-ortopediya mahsulotlari bilan taʼminlash, ijtimoiy nafaqalar kabi yoʼnalishlarda fuqarolarimizning xabardorligini oshirish kouchingni asosiy koʻzlangan maqsadi hisoblanadi.
⚠️“Elga xizmat – oliy maqsad!” shiori ostida kouching viloyatimiz bo’ylab barcha hududlarda tashkil etiladi.
🟢Ijtimoiy himoya milliy agentligi Namangan viloyati boshqarmasi matbuot xizmati
Наманган вилояти ҳокими Шавкатжон Абдураззоқов Тўрақўрғон туманида қишлоқ хўжалигида амалга оширилаётган энг долзарб ишлар билан танишди
Туманда жорий йилда 4009 гектар майдонда пахта етиштирилган. Айни кунларда терим мавсуми уюшқоқлик билан давом этяпти. Ўтган ҳафтадаги ёғингарчиликдан сўнг об-ҳавонинг мўътадил бўлиб туриши сафарбарликни яна кучайтиришни тақозо этмоқда.
Вилоят ҳокими “Раҳимберди ҳожи”, “Чорбоғ замин гулшани”, “Бураматут гулшани” фермер хўжаликларида пахта ҳосилини тоза ва сифатли териб олиш, ғалладан бўшаган майдонларга пешма-пеш ғалла экиш бўйича жараёнларни кўздан кечирди.
Теримчиларга яратилган шароитлар ҳам эътиборда бўлди. Деҳқонларнинг пешона тери билан етиштирилган пахта ҳосили далада қолиб кетмаслиги учун қўшимча чоралар кўриш, айниқса, ишсиз фуқаролар, камдаромадли оилаларни жалб қилиш бўйича масъулларга топшириқ ва тавсиялар берилди.
Тўрақўрғон тумани ҳокимлиги Ахборот хизмати.
Тўрақўрғон туманида 40 йиллик кўприк қайта қурилиб, фойдаланишга топширилди
Туманда Давлат раҳбарининг тегишли қарори билан 2024 йилда маҳаллалар инфратузилмасини янада яхшилаш бўйича 13,7 млрд. сўм маблағ ажратилиб, 12 та лойиҳалар, хусусан, энг муаммоли ички йўллар, ичимлик суви, электр энергияси ва кўприк каби масалалар эътиборга олинди.Тепа Найманча ва Паст Найманча маҳаллаларини боғлаб турувчи кўприк бундан қарийб 40 йил муқаддам таъмирланган бўлиб, яроқсиз ҳолга келганди. Юқоридаги махсус дастур асосида 2 миллиард сўм маблағ ажратилиб, сентябр ойининг биринчи ўн кунлигида қурилиш ишлари бошланди ва тезкор-сифатли равишда якунланди.
Бугун ана шу кўприкнинг очилиш маросими бўлиб ўтди. Унда вилоят ҳокимининг ўринбосари Окибжон Иномов, туман ҳокими Шерали Қосимов, сектор раҳбарлари, маҳалла нуронийлари, ёшлар вакиллари иштирок этишди. Сўзга чиққанлар аҳоли турмуш тарзини янада равнақ топтириш борасида қилинаётган ишлар учун муҳтарам Юртбошимизга миннатдорчилик билдирдилар. Бундай ҳаракатлар бардавомлигини тилаб, дуода бўлдилар. Қурувчилар меҳнати қадрланиб, совғалар тақдим этилди.
Тўрақўрғон тумани ҳокимлиги Ахборот хизмати