Янгиликлар
Тўрақўрғонда ёшларнинг ватан ҳимоясига тайёргарлик бобидаги дастлабки кўникмалари кўздан кечирилди
Ёшларни ҳарбий-ватанпарварлик руҳида тарбиялаш мақсадида умумтаълим мактабларида чақириққа қадар бошланғич тайёргарлик дарслари ўтилади. 12-мактаб мисолида ташкил этилган семинарда мазкур фан асослари, дарс жараёнида қўлланиладиган илғор услублар билан танишилди.
Вилоят мудофаа ишлари бошқармаси, бошқарманинг туман бўлими, Миллий гвардия қўриқлаш бошқармаси туман бўлими, Фавқулодда вазиятлар бошқармаси туман бўлими вакиллари иштирокида кечган тадбирда дастлаб мактаб ҳарбий-ватанпарварлик отряди аъзоларининг «Ваъда бериш» маросими кузатилди. Сўнгра “Ватанпарвар” ташкилоти Тўрақўрғон ўқув техника спорт клуби томонидан тайёрланган техникалар кўргазмаси намойиш этилди.
Тадбир қатнашчилари дарс жараёнида фойдаланиладиган ўқув қуроллари ҳақида батафсил маълумотга эга бўлдилар. Ўқувчиларнинг автомат қисмларини сочиш ва ёйиш бўйича қай даражада маҳоратга эга эканликлари кўрилди. Қолаверса, мерганлик бобидаги кўникмалари билан ҳам танишилди.
Тадбир сўнггида вилоят мудофаа ишлари бошқармаси бошлиғи ўринбосари Исмоил Ўринбоев ЧҚБТ фани ўқитувчилари олдида турган муҳим вазифалар ҳақида гапирди.
- Бу тадбир ўз фаолиятимизга танқидий қараш, айрим камчиликларни бартараф этишимиз учун муҳим бир омил бўлади. Чунки машғулотлар намойиши давомида ҳамкасбимиз, 12-мактаб ўқитувчиси Иброҳим Жалиловнинг ибратли томонларини обдон ўргандик. Нималарга янада эътибор кучайтиришимиз кераклигини кўрдик ва тегишли хулоса чиқардик, - дейди 33-мактаб ЧҚБТ фани муаллими, собиқ «афғончи» Неъматжон Мамадалиев.
Тўрақўрғонда ўсимликлар зараркунандаларига қарши курашишга бағишланган вилоят семинари ўтказилди.
«Турсунбой Комилов» фермер хўжалиги даласи шийпонида «Карантин хизмати – деҳқонга кўмакчи» мавзусида вилоят семинари ўтказилди.
Қишлоқ хўжалиги мутахассислари, маҳаллалардаги ҳоким ёрдамчилари, уста боғбонлар иштирокида кечган тадбирни вилоят ўсимликлар карантини ва ҳимояси бошқармаси бошлиғи Анварбек Ғаффоров очиб, дастлабки сўзни Ўсимликлар карантини ва ҳимояси агентлиги бош директори ўринбосари Бобур Ҳамроевга берди.
Б. Ҳамроев томорқада етиштириладиган мева-сабзавотларни турли зараркунандалардан ҳимоялашнинг аҳамияти ҳақида батафсил гапирди. Айниқса, экспортбоп маҳсулотлар етиштиришда бунга алоҳида эътибор қаратиш зарурлигини таъкидлади. Бу борада агентлик мутахассислари яқиндан кўмак беришга тайёр эканликларини билдирди.
Вилоят қишлоқ хўжалик бошқармаси бошлиғи Азизбек Абдусаломов мавзу юзасидан фикр-мулоҳазаларини билдирар экан, ҳар бир ҳудудда ўсимликлар ҳимояси учун барча шароитлар яратилганлигини айтди.
Йиғилганлар ўзларини қизиқтирган саволлар билан мурожаат этдилар. Кўргазмали материаллар билан танишилди. Махсус транспорт воситасидан жой олган кўчма лаборатория фаолияти ўрганилди. Бирор маҳсулотни ўрганиш зарурияти туғилганда кўчма лаборатория ходимлари жойига чиқиб, беминнат кўмак беришлари барчага маъқул келди.
Семинар иштирокчилари тумандаги хонадонларда ташкил этилган иссиқхона, хурмозор, боғларда бўлдилар. Касалликларга қарши курашиш бўйича тўрақўрғонликлар тажрибаси обдон ўрганилди.
Миллатлараро тинчлик-тотувликда яшасак, юртимиз янада обод бўлади
Бугун дунёда геосиёсий қарама-қаршиликлар ҳаддан зиёд авжига чиқди. Шундай шароитда миллатлараро ва конфессиялараро аҳил-иноқликни сақлаш, диний бағрикенгликда турмуш кечириш ҳар доимгидан долзарб аҳамият касб этмоқда. Туман маданият марказида ташкилланган тадбир айни шу масалага бағишланди.
Унда тумандаги маҳаллаларнинг нуронийлари, хотин-қизлар фаоллари, отинойилар, ёшлар етакчилари, таълим-тарбия масканларининг вакиллари иштирок этдилар.
Туман ҳокимининг биринчи ўринбосари Бобур Қобилов турли миллат ва элатлар истиқомат қиладиган Тўрақўрғонда ҳам ўзаро итттифоқликда яшашнинг аҳамияти ҳақида гапириб, Ўзбекистон Республикаси «Тасвирий ойина» ижодий уюшмаси бошқаруви раиси Исфандиёр Латиповга сўз берди.
И. Латипов мамлакатимизда касб-кори, дини, ижтимоий келиб чиқишидан қатъи назар, ҳамма бир хил ҳуқуқ ва эркинликларга эга эканлиги Конституциямизда мустаҳкамлаб қўйилганлигини алоҳида таъкидлади. Шунинг учун ҳам истиқлол йилларида барча учун бирдек қулай шароитлар яратилганлигини гапириб берди. Айниқса, кейинги йилларда шаҳар ва қишлоқларимиз тобора обод бўлиб бораётганлигини, ҳамюртларимизнинг турмуш шароитлари кундан-кун яхшиланаётганини ҳаётий мисоллар орқали баён қилди. Йиғилганлар ўзларини қизиқтирган масалалар юзасидан саволлар бердилар. Аҳил-иноқликда яшашнинг аҳамияти ҳақида фикр–мулоҳазалар билдирилди.
Истиқлол маҳалласи йўллари обод бўлмоқда
Тўрақўрғон туманида чекка ҳудудларда жойлашган маҳаллалар ички йўлларини ободонлаштиришга ҳар доимгидан кўпроқ эътибор қаратилмоқда. Йил бошидан бери Хўжанд маҳалласида 2,9 километр, Гулқишлоқда 3,8 километр йўллар бетонлаштириб бўлинди.
Дастурга кўра, энди Истиқлол маҳалласининг 3,7 километр ички йўлини ободонлаштиришга киришилган. Теракзор маҳалласидаги ишлар якунланиб, “Зиё” ҳамда “Оқтош” кўчаларида ҳаракат давом эттириляпти.
-Тўртта техника, 15 нафар ишчимиз билан ўзимизга ажратилган ҳудудда вақтдан унумли фойдаланиб меҳнат қиляпмиз,-дейди “Қурувчи” хусусий корхонаси иш бошқарувчиси Садриддин Ибрагимов.-Мақсадимиз, совуқ кунлар бошлангунга қадар аҳолига текис ва равон йўлларни фойдаланишга топшириш.
Нуронийлар панду насиҳатлари, эзгу дуолари ишларимизга барака келтириб, йўлларимизни нурафшон қилади. Айниқса, уларнинг суҳбатида бўлиш, дуосини олиш ҳаёт фалсафасини англатиб туради.
“Кексалар ҳафталиги” гарчи сана нуқтаи-назардан ниҳоялаган бўлса-да, мамлакатимизда пиру бадавлатларга йил бўйи эҳтиром кўрсатилади.
Тўрақўрғонда ўтказилган маънавий-маърифий тадбирда туманнинг ижтимоий-иқтисодий ривожига кўп йиллар ҳалол меҳнати билан ҳисса қўшган отахонлар таклиф этилдилар.
Шукроналик, илм-маърифат, Юртбошимиз ташаббуслари билан ташкил этилган “Бир нуроний ўн нафар ёшга масъул” лойиҳаси, маҳаллалардаги яраштириш комиссиялари фаолияти, маданият ва спортни ривожлантириш омиллари, китобхонликни тарғиб қилиш каби мавзуларда Бурхонжон Низомов, ижодкорлар Исоқжон Нишонов, Мамадали Саттаров, Комилжон Абдуллаев, Аҳмаджон Худойназаров, Неъматжон Тўйчиевларнинг мулоҳазалари ва ёшларга насиҳатлари тингланди.
Тадбирда она юрт, шукроналик, тинчликни тараннум этувчи куй-қўшиқлар янгради.
Мулоқотда туман ҳокимининг ўринбосари вазифасини бажарувчи Икромжон Парпиев қатнашди.