Сўнгги янгиликлар
Янгиликлар
ОҚТОШНИНГ МАҚОМИ ЯНА ТИКЛАНМОҚДА
Оқтош аввалдан Тўрақўрғоннинг саноат зонаси сифатида танилган. Бироқ, мустақиллик йилларигача корхоналар турли важлар билан тўхтаб қолди ёки фаолияти сустлашди. Энди эса унинг мавқеи яна тикланмоқда. Хусусан шаҳарча марказида, собиқ пахта пунктининг 3,3 гектар майдонида «Ёшлар кичик саноат зонаси» ташкил этишга киришилган. Мақсад, фойдаланилмай турган ҳудудда 15 та лойиҳани ҳаётга татбиқ этиш орқали ҳар хил ишлаб чиқариш тармоқлари фаолиятини йўлга қўйиш.
Айни пайтда бу ерда қурилиш юмушлари жадал суръатлар билан кетмоқда. Аксарият бино ва иншоотларнинг ғиштин деворлари қад ростлади, айримларида сувоқ ишлари бажарилмоқда.
Энг катта майдон - 1 гектар жойни эгаллаган «Рунамтекс» МЧЖнинг 2 қаватли биносида 25 нафар ишчилар меҳнат қилмоқда.
- Асосий темир-бетон ишлари бажарилган биринчи қаватнинг томини ёпаяпмиз. Яъни кўриб турганингиздек, бетон плиталар ётқизиляпти. Шундан кейин юмушлар иккинчи қаватга кўчади, - деди қурилиш ишларини юритувчи мутахассис Шермирза Темиров. МЧЖга қарашли мазкур жойда тикувчилик ва тўқимачилик маҳсулотлари тайёрлаш кўзда тутилган. Лойиҳага 3 миллион 800 минг АҚШ доллари миқдоридаги хорижий инвестиция жалб этилади. Муҳими, асосан экспортга маҳсулот йўналтирилиши кўзда тутилган мазкур корхона тўла қувват билан фаолият кўрсата бошлагач, 700 та иш ўрни яратилади.
Бундан ташқари, «Нодирабегим Зуҳро тимсоли» МЧЖда пластмасса яшиклар, «Муҳаммад тред индустри» оилавий корхонасида мебель жиҳозлари, «Муҳаммад, Имронбек, Шуҳрат»да эса қандолатчилик маҳсулотлари ишлаб чиқарилади.
Умумий қиймати 65,5 млрд. сўмлик юмушлар бажариладиган кичик саноат зонасига 17,8 млрд. сўмлик банк кредитлари йўналтирилади. Тадбиркорлар томонидан эса 47,7 млрд. сўмлик маблағ ўзлаштирилади. Лойиҳалар рўёбга чиқарилиши туфайли 1 минг 500 дан зиёд меҳнатга эҳтиёжмандлар фойдали юмуш билан таъминланадилар.
Зафар муборак, тўрақўрғонликлар!
Тўрақўрғон тумани пахтакорлари "Наманган тўқимачи агрокластери" ҳамкорлигида “Ёшларни қўллаб-қувватлаш ва аҳоли саломатлигини мустаҳкамлаш” йилининг ҳосилини етиштириш ва давлатга топшириш бўйича режани вилоятда биринчи бўлиб бажаришга эришдилар. 4269 гектар майдондан жами 15830 тонна юқори сифатли саноат хом ашёси давлат омборларига етказиб берилди. Ҳар гектар ердан қарийб 38 центнердан ҳосил олишга эришилди.
Бу ютуқларга аввало муҳтарам Президентимиз томонидан фермерларга яратиб берилган беқиёс шароитлар, кластер тизимининг мақбуллиги асосий омил бўлди. Ерни ўз вақтида экишга тайёрлашдан тортиб пахта теримигача бўлган агротехника қоидаларига қатъий амал қилинди. Теримга ишсиз аҳоли жалб этилиб, уларнинг рўзғорлари янада тўкис бўлиши таъминланди. Натижада 91 та фермер хўжалигидан 65 тасида бугунги кунга пахта сотиш режаси бажарилди. Хусусан, “Бураматут гулшани”, “Комилов Турсунбой”, Бахтиёр, Неъмат, Шавкат”, “Каримов Ёқубжон саховати”, “Нўъмонжон ҳожи набираси Асадбек”, “Ситабону”, “Ибрат файз толаси”, “Шоҳидон бургути” каби ўнлаб фермер хўжалиги деҳқонлари катта хирмонга салмоқли улуш қўшишди.
Режа бажарилган бўлсада, далаларда ҳосил ҳали кўп. Деҳқонларнинг заҳматли меҳнати эвазига етиштирилган миллий бойлигимизни асло нобуд қилмай йиғиб олиш ва вилоятимизнинг катта хирмони юксалишига янада муносиб ҳисса қўшиш тўрақўрғонликларнинг навбатдаги олган маррасидир.
Ҳудудларда “Ҳоким ёрдамчиси” лавозими жорий этилмоқда.
Жорий йилнинг 19 октябрь куни вилоят Иқтисодий тараққиёт ва камбағалликни қисқартириш Бош бошқармасининг мажлислар залида Ҳукумат топшириғига асосан “Маҳаллабай” ишлаш тизими бўйича Уйчи тумани мисолида ташкил этилаётган “ҳоким ёрдамчиси” лавозимига номзодларнинг келгусида амалга оширилиши лозим бўлган вазифалар юзасидан муҳокама йиғилиши бўлиб ўтди.
Эндиликда “маҳаллабай” ишлаш тизимини кейинги босқичга олиб чиқиш маҳалланинг ўзида туриб, барча масалаларни ҳал қилиш чораларини кўриш фаолияти билан шуғулланиш мақсадида “Ҳоким ёрдамчиси” лавозими жорий этилади.
«Ҳоким ёрдамчиси»нинг асосий вазифалари:
«Хонадонбай» сўровлар ўтказиш орқали маҳалланинг ижтимоий-иқтисодий ривожланиш «портрети»ни ишлаб чиқиш;
Маҳалланинг ихтисослашуви ва «ўсиш нуқталари»дан келиб чиққан ҳолда оилавий тадбиркорликни ривожлантириш чораларини кўриш, ишсиз аҳолини касб-ҳунарга ўқитиш, ишга жойлашиш истагини билдирган ишсизларни бандлигини таъминлаш ва аҳолини ўзини ўзи банд қилишга кўмаклашиш;
“Ижтимоий шартнома” тизими орқали тадбиркорлик қилиш истагида бўлган фуқароларга, жумладан аёллар ва ёшларга кредит ҳамда субсидиялар ажратиш;
Тадбиркорлик субъектларининг бизнес лойиҳаларини амалга оширишга кўмаклашиш, мавжуд муаммоларини "мижозбай" ўрганиш ҳамда ҳал этиш орқали тадбиркорлик фаолиятини кенгайтиришга амалий ёрдам кўрсатиш, мавжуд инструмент ва ресурслардан самарали фойдаланишни ташкил этиш;
Ҳудудий ва инвестиция дастурларига таклифлар ишлаб чиқиш ҳамда маҳалланинг ривожланишига доир дастурлар ижросини назорат (мониторинг) қилади.
Йиғилишда вилоят ҳокимининг биринчи ўринбосари Толибжон Юсупов ҳамда бошқарма ва ташкилотларнинг биринчи ўринбосарлари иштирок этишди.
ҲАР БИР МУРОЖААТ АДОЛАТЛИ ҲАЛ БЎЛДИ
Тўрақўрғон тумани ҳокимлигида ташкил этилган навбатдаги ҳоким қабулида турли масалалардаги мурожаатлар бўлди ва уларни ҳал этиш чоралари кўрилди.
«Тошкент» маҳалласида яшовчи фуқаролар номидан келган вакиллар мазкур ҳудудда қурилиши режалаштирилаётган 330 ўринли мактабни аҳоли учун янада қулайроқ жойда барпо қилиш таклифи билан мурожаат этдилар. Улар билдирган фикр-мулоҳазалар обдон ўрганилиб, лойиҳа ижроси пайтида эътиборга олинадиган бўлди.
Шаҳанд қишлоғида истиқомат қилувчи фуқаро укасининг тўйи учун моддий ёрдам зарурлигини айтди. Туман ҳокими Зулайҳо Маҳкамова ун, ёғ, сабзавот сингари озиқ-овқат маҳсулотларидан кўмак берилишини ваъда қилди. Ногиронлиги мавжуд мурожаатчининг аҳволи ҳисобга олиниб, унинг ўзига ҳам кийим-бош совға қилинадиган бўлди.
Янгиободлик аёл арзон уй-жой билан тамъинлаш масаласида мурожаат этди. Хоким қурилиш бўйича мутахассисларга фуқаронинг талаби қонуний қондирилиши юзасидан топшириқ берди.
Шунингдек, Шарқ маҳалласида яшовчи, моддий томондан қийин шароитга тушиб қолган фуқаронинг 1,5 ёшли фарзандини болалар боғчасида имтиёзли юришида кўмак бериш, Паст Найманчада истиқомат қилувчи аёлнинг муқим иш билан таъминлаш бўйича қилган мурожаатлари ҳам ечимини топадиган бўлди.
Қабулда Ўзбекистон Республикаси Президентининг Тўрақўрғон туманидаги Халқ қабулхонаси мудири Лазизжон Собиров, туман ҳокимининг биринчи ўринбосари Элёржон Турғунов ва хизмат кўрсатувчи ташкилот ҳамда идораларнинг вакиллари қатнашдилар.
Ўзбекистон Республикасида Аҳолини рўйхатга олишда респондентларнинг ҳуқуқ ва мажбуриятлари-ўзининг шахсга доир маълумотлари нима мақсадда йиғилаётганлигини, ушбу маълумотлардан ким ва қандай тарзда фойдаланишини билиш;-ўзи учун тўлдирилган рўйхатга олиш варақлари билан танишиб чиқиш, рўйхатга олиш варақларига киритилган шахсга доир маълумотларнинг тўлиқлиги ва ишончлилигини аниқлаштириш;-рўйхатга олувчи ходимлардан тегишли гувоҳномани кўрсатишини талаб қилиш, рад этилган тақдирда эса — рўйхатга олиш варағидаги саволларга жавоб бермаслик;-рўйхатга олиш варағининг шаклига биноан шахсга доир ишончли маълумотларни тақдим этиш ҳуқуқига эга.-Респондентлар аҳолини рўйхатга олишни ўтказишга монелик қилмаслиги шарт.