Сўнгги янгиликлар
Янгиликлар
“МУСТАҚИЛЛИКНИНГ 30 ЙИЛЛИГИ” КЎКРАК НИШОНЛАРИ ТОПШИРИЛДИ
Тўрақўрғон маданият марказида туманнинг ижтимоий-иқтисодий ривожланишига ўзининг муносиб ҳиссасини қўшиб келаётган 154 нафар турли соҳа вакиллари “Мустақилликнинг 30 йиллиги” кўкрак нишонлари билан тақдирланишди.
Туман ҳокими Зулайҳо Маҳкамова барчани энг улуғ, энг азиз байрам билан табриклади.
Тадбир давомида вилоят ва туманимиз санъат усталарининг катта концерт дастури намойиш этилди.
Мукофотланганларни муборакбод этамиз.
“ЯНГИ ЎЗБЕКИСТОНДА ЭРКИН ВА ФАРОВОН ЯШАЙЛИК”Тўрақўрғон туманида мустақилликнинг 30 йиллигига бағишланган байрам тадбири бўлиб ўтди
Жонажон Ватанимизда байрамлар жуда кўп. Лекин, давлатимиз истиқлолга эришган, халқимиз чин маънода озод бўлган сана –мамлакатимиз мустақиллиги куни алоҳида тантана билан шодиёна қилинади.
Муҳтарам Президентимиз Шавкат Мирзиёев эътироф этганларидек, “биз қандай таҳликали ва суронли даврларни бошимиздан кечирмайлик, қандай ютуқ ва натижаларга эришган бўлмайлик, мустақиллик ғояси, истиқлол руҳи бизга доимо тоғдек таянч бўлмоқда.
Чиндан ҳам мамлакатимиз дунёнинг ривожланган давлатлари ичида ўзининг салоҳияти билан нуфузли ўринларни эгаллаб олди. Янги Ўзбекистон даврида буюк ўзгаришлар рўй берди ва давом этмоқда.
Ер куррасининг айрим жойларида жангу жадал, ахборот ҳуружлари, нотинчлик кузатилаётган шу кезларда бизда ободонлаштириш, уйлар қуриш, гуллар экиш, тўйлар қилиш давом этяпти. Биз шундай улуғ, тинч-осойишта мамлакатда яшаётганимизга ҳар қанча шукроналар айтсак арзийди.
Ёзги томошагоҳда ташкилланган тадбирда туман ҳокими Зулайҳо Маҳкамова барчани қутлуғ айём билан муборакбод этди. Истиқлол йилларида Тўрақўрғонда ҳам қандай буюк ўзгаришлар амалга оширилганига барчамиз гувоҳмиз. Айниқса, кенг кўламли бунёдкорлик ишлари туманимиз қиёфасини тубдан ўзгартириб юборди. Иқтисодиётимизнинг барча соҳаларида ривожланишнинг юқори кўрсаткичлари таъминланмоқда. Шаҳар ва қишлоқларимизда одамларнинг турмуш тарзи бир неча баробар ошди. Ёшларимизнинг билим олиш ва касб-ҳунар эгаллашга иштиёқлари кучайди. Тадбиркорларимиз сафи кенгайиб, тафаккурлари бойиди, янги-янги лойиҳалар амалга тадбиқ этилмоқда. Буларнинг ҳаммаси, шубҳасиз, юртимиздаги тинчлик-осойишталик, халқимизнинг баҳамжиҳатлигидандир. Байрам арафасида Президентимиз Фармонларига кўра бир гуруҳ юртдошларимиз давлатимизнинг юксак мукофотлари билан тақдирландилар. Улар сафида туманимиздаги Ёртепа маҳалла фуқаролар йиғини раиси Ҳалимахон Абдураҳмонова “Меҳнат шуҳрати” ордени, Исҳоқхон Ибрат номидаги мактаб-интернатининг ўқитувчиси Муяссар Боқихонованинг “Шуҳрат” медали билан тақдирлангани тўрақўрғонликларнинг байрам кайфиятини янада оширди.
Байрам тадбирида бир гуруҳ фаоллар “Мустақилликнинг 30 йиллиги” кўкрак нишони ва бошқа мукофотлар билан тақдирландилар. Туман маданият бўлими томонидан саҳналаштирилган бадиий дастур намойиш этилди. Ўзбекистонда хизмат кўрсатган артист Яҳёбек Мўминовнинг дилтортар қўшиқлари барчага манзур бўлди.
Шундай байрамлар туманимизнинг барча маҳаллаларида давом этмоқда.
МИГРАНТЛАР ҲОЛИДАН ХАБАРДОР БЎЛИШ ДОИМИЙ ВАЗИФАМИЗ
Ўзбекистон Республикаси Меҳнат вазирининг 1-ўринбосари Эркин Муҳитдинов мустақиллик байрами арафасида Тўрақўрғонда келди. Шуни хушнудлик билан эътироф этиш ўринлики, ўтган ойда туманда ўтказилган учрашувда Чусткўприк маҳалласида яшовчи чевар Раънохон Рустамованининг ишсиз аёлларга ҳунарини ўргатаётгани, аммо, тикув машиналари етишмаслиги туфайли муаммолар юзага келаётгани, агар мумкин бўлса субсидия асосида машиналар олишига ёрдам сўраб мурожаат қилганди. Ўшанда вазир ўринбосари агар кооператив корхона ташкил этиб, қонуний рўйхатдан ўтса, албатта талабини қондиришга ваъда берганди.
Раънохон “Nano Art Style” ишлаб чиқариш кооперативини ташкил этиб, 25 та аёлларнинг доимий бандлигини таъминлади. Жамоа ихтиёрига вазирлик томонидан 25 та чок машиналар таъминлаб берилди.
Бугун ушбу корхонанинг очилиш маросими ҳам бўлиб ўтди. Унда шахсан Эркин Муҳитдинов, туман ҳокими Зулайҳо Маҳкамова иштирок этишди.
Шундан сўнг вазирнинг 1-ўринбосари туманда ҳатловга олинган мигрантлар масаласи билан қизиқди. Кумидон маҳалласидан четга ишлаш учун кетган Сарвар Азимов, Хасанбой Ўринбоев, Икромжон Аҳмедов, Турсунбой Мамажоновларнинг оилаларига борди. Телефон орқали улар билан мулоқотда бўлди, ота-оналаридан ҳол сўради. Октябр ойида бўлиб ўтадиган Президент сайловида шу юрт фарзандлари сифатида мигрантлар ҳам танлаган номзодига овоз бериши керак. Бунинг учун 14 октябрдан бошлаб 7 кун давомида хорижда ишлаётган ўзбекистонликлар билан сайёр йиғилишлар ўтказилади ва овоз бериш ташкилланади.
Туманда ҳатлов натижасида беш минг нафар ишлаш учун четга кетган фуқаролар бор. Уларнинг ҳар бири билан шундай тартибда алоқа ўрнатиш, муаммолар аниқланган тақдирда вазирликнинг жойлардаги ташкилотларига хабар бериш яна бир бор таъкидланди.
ТАДБИРКОР МУРОЖААТИ ОРТИДА ИЗЛАНИШ, ИНТИЛИШ БОР
Янги Ўзбекистон даврида муҳтарам Президентимиз Шавкат Мирзиёев ташаббуслари билан тараққиётнинг бутунлай янги босқичига қадам қўйдик ва унинг натижалари бугун ҳаётимизда, фаолиятимизда акс этмоқда. Айниқса, тадбиркорларга барча имкониятлар яратилди, фаолият йўлларидаги ҳамма тўсиқлар олиб ташланди.
Яқинда Президентимизнинг тадбиркорлар билан бўлган учрашувлари юртимиз тарихида тарихий воқеа бўлди, десак адашмаган бўламиз. Юртбошимиз эришилган салмоқли муваффақиятлар билан бир қаторда ҳали ҳал этилиши лозим бўлган муаммоларни ҳам очиқ-ойдин гапириб ўтдилар ва тадбиркорликни янада ривожлантириш, яратиладиган қулайликлар бўйича галдаги режалар билан таништирдилар.
Маданият марказида ташкилланган “Ҳоким ва тадбиркорлар” учрашуви ана шу мавзуга бағишланди. Туман ҳокими Зулайҳо Маҳкамова Президент белгилаб берган, тадбиркорлар манфаатига хизмат қилувчи 7 та муҳим устувор йўналишларни шарҳлаб, ҳар бир секторда алоҳида штаблар ташкил этилиши ва уларда масъуллар мурожаатларни қабул қилиб, ҳал этиш чораларини кўришларини билдирди.
Тадбирда туман иқтисодиётига баракали улуш қўшиб келаётган, кўплаб янги иш ўринларини яратган, маҳсулотларини хориж давлатларига экспорт қилиб ном қозонган бир гуруҳ тадбиркорлар туман ҳокимлигининг Ташаккурномаси билан тақдирландилар.
Учрашувда 20 дан ортиқ мурожаатлар ҳам эшитилди. Улар асосан кредит, бино ёки ер олиш, инфратузилма, кадастр, солиқ масалаларида бўлиб, ҳар бири бўйича таҳлил ўтказилди ва назоратга олинди.
БАЙРАМ СОВҒАСИГА ЎҚУВ ҚУРОЛЛАРИ
Туман тиббиёт бирлашмаси, тиббиёт ходимлари касаба уюшмаси кенгаши томонидан соҳада фидойилик билан меҳнат қилаётган, “Аёллар дафтари”да турган оналарнинг фарзандларига мустақиллик байрами ва янги ўқув йили олдидан 12 турдаги ўқув қуроллари солинган сумкалар совға қилинди.
-Мана шу майдон ҳамюртимиз, тарихчи олим, таржимон, педагог, ношир Исҳоқхон Ибрат хотирасига бунёд этилган. Бу инсон мактаблар йўқ маҳалда болаларни билимли бўлишлари учун қайғурган, китоблар чоп этган. Бугунги кунда фарзандларимизнинг илм олишлари учун яратиб берилган шароитлардан дил яйрайди,-деди тадбирда иштирок этган туман ҳокими Зулайҳо Маҳкамова.
- Совғали бўлган ўғил-қизлар келажакда юртга хизмат қиладиган ақлли, доно, яхши касб-ҳунарли инсонлар бўлиб етишишга ваъда беришди. Орзулари амалга ошиши учун биз ҳам имкониятимиз борича кўмаклашамиз,-дейди тиббиёт ходимлари касаба уюшмаси туман кенгаши раиси Шаҳноза Кимёназарова.