Янгиликлар
Шошилинч тиббий ёрдам бўлими янги бинода
Тўрақўрғон туман марказий шифохонасининг шошилинч тиббий ёрдам бўлими 2001 йилда собиқ болалар бўлими биносини ҳашар усулида капитал таъмирлаш йўли билан ташкил қилинган.
Шу бино Давлат инвестиция дастурига биноан 2020-2021 йиллар давомида мукаммал реконструкция қилинди. Қўшимча 2 қаватли бино қурилди. Қурилиш - таъмирлаш ишлари “Осим қурилиш дизайн” МЧЖ томонидан олиб борилди. Бунинг учун 13 млрд. 197 млн. сўм маблағ сарфланди. Эндиликда ушбу бўлим таркибида алоҳида беморларни шошилинч қабул қилиш блоки, диагностика блоки, анестезиология – реанимация бўлими операция блоки билан, 10 ўринли шошилинч хирургия, 10 ўринли шошилинч терапия ва 10 ўринли шошилинч педиатрия постлари мавжуд. Ушбу бўлимда 28 нафар врач, 110 нафар ўрта тиббиёт ходимлари ва 62 нафар кичик тиббиёт ходимлари фаолият кўрсатади.
Энг замонавий услубда қайта кўрк ростлаган бинонинг очилиш маросимида тиббиёт соҳаси фахрийлари, инсон саломатлиги учун ҳормай меҳнат қилаётган шифокорлар, аҳоли вакиллари жам бўлдилар.
Туман ҳокими Зулайҳо Маҳкамова эртага нишонланадиган касб байрамлари ва янги бино тақдимоти билан жамоани муборакбод этди. Меҳнат фахрийси Аҳмаджон Худойназаров соҳага қаратилаётган эътибор ҳақида тўлқинланиб сўзлади ва бу шароитларни қадрлаб ишлаш лозимлигини билдирди.
Шинам ва барча зарур тиббиёт асбоблари билан жиҳозланган хоналарни кўриб, аввало ҳеч ким бемор бўлмасин, келган дардмандлар бутунлай соғайиб оиласига қайтсин, дея дуо қилинди маросимда.
ЯНГИ ЎЗБЕКИСТОННИНГ ЯНГИ БОҒЛАРИ ТЎРАҚЎРҒОНДА ҲАМ БАРПО ЭТИЛМОҚДА
Республикамизнинг барча худудларида бўлгани каби Тўрақўрғонда ҳам манзарали ва мевали кўчатлар экиш қизғин давом этяпти. Ҳам экологик мусаффолик, ҳам витаминларга бой мева-сабзавот етиштиришни кўпайтириш мақсадидаги ушбу ташаббус кенг қўллаб-қувватланаётганлиги билан аҳамиятлидир.
Туманда "Яшил майдон" лойиҳаси доирасида 2021 йил кузи ва 2022 йилнинг баҳор мавсумларида 1 миллион 674 минг 477 туп манзарали, мевали ҳамда бутали кўчатлар ва қаламчалар экиш режалаштирилган.
“Тўрақўрғон ИЭС” яқинидаги “Шоҳидон нурли диёр” массивида тадбиркор Абдуғани Қозоқов ўз ҳисобидан 4, 5 миллиард сўм сарфлаб жами 50 гектар майдонда 175 минг тупдан зиёд кўчатлар экиб, кичик ўрмонзор ва боғ барпо қилиш ташаббуси билан чиққан эди.
Бугун ана шу масканда дастлабки кўчатлар экиш тадбири бўлиб ўтди. Унда вилоят ҳокими Шавкатжон Абдураззоқов, вилоят прокурори Жаҳонгир Ҳотамов, нуронийлар, ёшлар вакиллари, жамоатчилик иштирок этишди. Наманган ўрмон хўжалигидан келтирилган манзарали дарахтлар, тадбиркор томонидан етиштирилган экспортбоп, эртапишар кўчат ниҳоллари ўтқазилди.
Тўрақўрғонлик тадбиркорга Президент совғаси топширилди
“Дилрабо СДА ” кўп тармоқли хусусий савдо ишлаб чиқариш корхонаси 2004 йилда ташкил топган. Фаолияти жами 80 турдан ортиқ болалар, эркаклар ва аёлларга трикотаж матолардан ички ва ташқи кийимлар тикишдан иборат бўлган корхонада бугунги кунда 700 нафардан зиёд хотин-қизлар меҳнат қилади. Уларга бепул транспорт ва тушлик жорий этилган, ойлик маошлари ўртача 1,5 миллион сўмни ташкил этади.
Корхонанинг йиллик ишлаб чиқариш қуввати йилига 1 млн. 250 минг дона, маҳсулотлар юз фоиз Россия, Қозоғистон давлатларига экспорт қилинади.
Яқинда республика Касаба уюшмалари федерацияси томонидан эълон қилинган танловда корхона директори, “Дўстлик” ордени соҳибаси Маъсудахон Содиқова энг кўп иш ўрни яратган раҳбар номинацияси бўйича республикада биринчи ўринни эгаллаб, Президент совғаси “Жентра” автомобили билан тақдирланди.
Тадбиркорнинг пойтахтдан эътибор ва катта совға билан қайтиши туманда байрамга айланиб кетди. Туман ҳокими Зулайҳо Маҳкамова, сектор раҳбарлари, корхона жамоаси М. Содиқовани гуллар билан кутиб олишди.
-Ҳар бир ишчини ўз фарзандимдек кўраман, қўлимдан келганча ғамҳўрлик кўрсатаман. Муваффақиятларимнинг боиси шундан бўлса керак,-дейди у.
«Ахсикент ўз даврининг йирик мегаполиси бўлган. Президент ташаббуси билан қайта барпо этилаётган тарихий мажмуа Осиёнинг меъморий марваридига айланиши лозим. Янги Ўзбекистон мажмуаси эса ўзининг замонавий ечими билан бетакрор бўлмоғи лозим», - Наманган вилояти ҳокими Шавкатжон Абдураззоқов туркиялик меъморлар - Синон Тўраман ва Али Илғорни қабул қилди.
Меъмор Синон меҳмонхона, кутубхона, музей, савдо маркази ҳамда бозор, ресторан ва кафелар, амфитеатр ва бошқа инфратузилмаларни ўз ичига олган Ахсикент мажмуаси лойиҳасини тақдимот қилди.
Шунингдек Янги Ўзбекистон боғи бош режаси бўйича илк таклифлар ўртоқлашилди.
