Сўнгги янгиликлар
Янгиликлар
Наманган делегацияси биринчи Тошкент халқаро инвестиция форумида
Аввал хабар берганимиздек, кеча биринчи Тошкент халқаро инвестиция форуми ўз ишини бошлади.
Халқаро инвестицион тадбирнинг очилиш маросими ҳамда биринчи иш кунида Наманган вилояти ҳокими Шавкатжон Абдуразаков бошчилигидаги вилоят делегацияси ҳам иштирок этди.
Жорий йилнинг 24-26 март кунлари Тошкент шаҳрида бўлиб ўтаётган биринчи Тошкент халқаро инвестицион форуми доирасида вилоятимиз раҳбари бошчилигидаги делегация бир қатор хорижий давлатлар компаниялари вакиллари билан учрашувлар ўтказди.
Австрия Республикасининг “АМЕ International” компанияси вакиллари билан ҳамкорлик истиқболлари муҳокама қилинди. Ушбу йирик компания тиббиёт муассасалари ва тиббиётни рақамлаштириш бўйича эксперт компаниялардан бири ҳисобланади. Бундан ташқари тиббиёт воситалари ишлаб чиқариш, соғлом турмуш тарзини ҳаётга татбиқ этиш бўйича ҳам юқори тажрибага эга эканлиги билан ажралиб туради. Учрашувда кўп томонлама манфаатли келишувлар бўйича музокаралар ўтказилди.
Ўзбекистон Республикасида аҳолининг айрим тоифаларини рўйхатга олиш тартиблари.
Аҳолининг айрим тоифаларини рўйхатга олишнинг хусусиятлари:- чақирув асосида ҳарбий хизматни ўтаётган ҳарбий хизматчилар, шунингдек, ёпиқ ҳудудларда шартнома бўйича ҳарбий хизматни ўтаётган ҳарбий хизматчилар ва уларнинг оила аъзолари Мудофаа вазирлиги ва бошқа қуролли кучларнинг ёпиқ ҳудудлари бўйича рўйхатдан ўтадилар. Ёпиқ ҳудудлардан ташқарида ўз шахсий уйида истиқомат қилиб, ҳарбий хизматни ўтаётганлар ва уларнинг оила аъзолари доимий яшаш жойи бўйича рўйхатдан ўтадилар;- озодликдан маҳрум қилиш муассасаларидаги шахслар, жазони ўташ жойи бўйича рўйхатга олинади;- мактаб интернатларида таълим оладиган ва фақат дам олиш кунлари уйларига қайтадиган ўқувчилар ота ёки онасининг доимий яшаш жойи бўйича рўйхатга олинади;- рўйхатга олиш даврида шифохона, санатория ва шу каби бошқа ижтимоий ташкилотларда 1 йилдан ортиқ муддатдан буён даволанаётганлар ушбу ташкилотлар манзили бўйича рўйхатга олинади;- доимий яшаш жойига эга бўлмаган шахслар (уйсизлар) рўйхатга олувчига ажратилган ҳудуд (манзил) бўйича рўйхатга олинади. Агар рўйхатга олувчилар ўз участкасида уйсизларга дуч келса, уларни 4-шакл бўйича рўйхатдан ўтказади ва ҳар бири учун 2-шаклни ҳам тўлдиради;- Ўзбекистон Республикасининг чет элдаги дипломатик ваколатхоналари ва консуллик муассасалари, халқаро ташкилотлар қошидаги Ўзбекистон Республикаси ваколатхоналари ва миссиялари ходимлари бўлган фуқаролар ва уларнинг оила аъзолари, шунингдек, Ўзбекистон Республикаси Ташқи ишлар вазирлиги томонидан халқаро ҳукуматлараро ташкилотлардаги квоталанган лавозимларга юборилган фуқароларни рўйхатга олиш Ўзбекистон Республикаси Ташқи ишлар вазирлиги томонидан амалга оширилади.
Байрамингиз муборак бўлсин, азиз маҳалла тизими ходимлари
Ушбу кун муносабати билан Тўрақўрғон маданият марказида тадбир бўлиб ўтди.
Маҳалла тизими ходимларини табриклаган туман ҳокими Аҳроржон Мансуров эътироф этганидек, мамлакатимизда нишонланаётган ушбу байрам яшариш ва янгиланиш, меҳр-оқибат айёми – Наврўз тантаналари давом этаётган мана шундай шукуҳли кунда ўтказилаётганида ўзига хос рамзий маъно бор.
Чунки ҳар бир инсон, миллати, тили ва динидан қатъи назар, ўз ҳаётини, қувончу ташвишларини маҳалладан айри ҳолда тасаввур эта олмайди.
Туманимиздаги ҳар-бир маҳалла раиси ва фаоллари мустақил Ўзбекистонимизнинг фидойиларидир. Муҳтарам Президентимиз ташаббуслари билан бу тизимга ҳоким ёрдамчилари, ёшлар етакчилари ва хотин-қизлар фаолларини кириб бориши мамлакатимизда инсон қадрини улуғлашга қаратилган буюк ҳаракатлардир. “Инсон қадрини улуғлаш ва фаол маҳалла йили”да бу янада исботини топмоқда.
Тадбирда бир гуруҳ маҳалла тизими фидоийлари туман ҳокимлигининг Ташаккурномаси ва эсдалик совғалари билан тақдирланишди.
Маданият бўлими жамоаси бадиий дастур орқали уларга байрам кайфиятини тортиқ этишди.
Бугун маърифатпарвар шоир, атоқли тилшунос, тарихшунос олим, илк ўзбек матбаачиларидан бири, публицист ва прогрессив педагог Исҳоқхон Ибрат таваллуд топган кун
Шу муносабат билан Тўрақўрғон тумани марказидаги унинг номи билан аталувчи мажмуада хотира тадбири бўлиб ўтди.
Туман раҳбарлари, нуронийлар, ёшлар вакиллари Исҳоқхон Ибрат ҳайкали пойига гулчамбарлар қўйиб, унинг хотирасини ёд этишди.
Йиғилганлар у ҳақидаги маълумотларни яна бир бор дилга жой этишди. Дарҳақиқат, Ибрат 1862 йилда Наманганга яқин Тўрақўрғон қишлоғида боғбон оиласида туғилди. У ёшлигидан илм олишга интилди, чет эл сафарида бўлди: Истамбул, София, Афина, Рим каби Европанинг марказий шаҳарларида, Шарқнинг Қобул, Жадда, Макка, Калькутта, Бомбай каби йирик шаҳарларида истиқомат қилди.
Ибрат ўқитувчи кадрлар тайёрлаш, хотин-қизларни илм-маърифатга жалб қилишда фаол қатнашди ҳамда ижодий иш билан машғул бўлди.
Исҳоқхон тўранинг ўзига «Ибрат» тахаллусини олиш боиси шундаки, у ижодининг дастлабки йилларидан бошлаб маърифатпарвар шоир, олим сифатида ном чиқарди ва замона илмидан, илғор маданиятдан ўрнак олишга, ибрат олишга чақирди.
Шунинг учун ҳам Ибрат ҳозирги авлодлар учун чинакам ибрат мактабини яратган инсон сифатида яшамоқда.
Тўрақўрғонда “Наврўз” шодиёналари
Гўзал ва бетакрор юртимизга барчамиз орзиқиб кутган, дилбар фасл - Наврўзи олам кириб келди.
Муҳтарам Юртбошимиз таклифлари билан Наврўз байрамини халқ сайли сифатида нишонлаш анъанага айланиб бораётгани, албатта, барчамизни беҳад қувонтирди.
Бугун Тўрақўрғоннинг маркази Наврўз қувончларига тўлди. Байрамона кайфият, тинчлик-хотиржамлик, тўқчилик, фаровонлик шукронаси билан халқимиз бу айёмни нишонлаш учун ҳозир бўлдилар.
Дунёда бир-биридан ажойиб байрамлар кўп. Лекин, улар орасида Наврўз айёми ўзининг қадимийлиги, табиатимизга уйғунлиги ва гўзаллиги, маъно-мазмунининг теранлиги билан бошқалардан ажралиб туради. Баҳор ҳаётга муҳаббат, яшаш иштиёқини оширади, келажакка ишончни мустаҳкамлайди.
Байрам сайлида тумандаги ташкилот ва муассасалар, корхоналар ўзлари эришган муваффақиятларни ифода этдилар. Кўклам пишириқлари, дошқозонларда сумалак, палов дамланди. Куй-қўшиқлар, рақслар ижро этилди.
Туман ҳокими Аҳроржон Мансуров бошчилигида сектор раҳбарлари, ҳоким ўринбосарлари, нуронийлар, ёшлар кўргазмаларни айланиб, кўришди. Унинг ташкилотчиларига миннатдорчилик билдиришди. Кексалар дуоларида йил қандай ният билан бошланса, то охиригача ўша ният ҳамроҳ бўлади, деган ниятда шундай хурсандчилик билан бошланаётган йилимиз юртимизга тинчлик, бахт-саодат, қут-барака, ободлик ва фаровонлик олиб келишини тиладилар.
Байрам туманимизнинг барча маҳаллаларида ҳам шундай шодиёналар билан нишонланмоқда.