Янгиликлар
Тўрақўрғон туманида 40 йиллик кўприк қайта қурилиб, фойдаланишга топширилди
Туманда Давлат раҳбарининг тегишли қарори билан 2024 йилда маҳаллалар инфратузилмасини янада яхшилаш бўйича 13,7 млрд. сўм маблағ ажратилиб, 12 та лойиҳалар, хусусан, энг муаммоли ички йўллар, ичимлик суви, электр энергияси ва кўприк каби масалалар эътиборга олинди.Тепа Найманча ва Паст Найманча маҳаллаларини боғлаб турувчи кўприк бундан қарийб 40 йил муқаддам таъмирланган бўлиб, яроқсиз ҳолга келганди. Юқоридаги махсус дастур асосида 2 миллиард сўм маблағ ажратилиб, сентябр ойининг биринчи ўн кунлигида қурилиш ишлари бошланди ва тезкор-сифатли равишда якунланди.
Бугун ана шу кўприкнинг очилиш маросими бўлиб ўтди. Унда вилоят ҳокимининг ўринбосари Окибжон Иномов, туман ҳокими Шерали Қосимов, сектор раҳбарлари, маҳалла нуронийлари, ёшлар вакиллари иштирок этишди. Сўзга чиққанлар аҳоли турмуш тарзини янада равнақ топтириш борасида қилинаётган ишлар учун муҳтарам Юртбошимизга миннатдорчилик билдирдилар. Бундай ҳаракатлар бардавомлигини тилаб, дуода бўлдилар. Қурувчилар меҳнати қадрланиб, совғалар тақдим этилди.
Тўрақўрғон тумани ҳокимлиги Ахборот хизмати
Германия халқаро ҳамкорлик ташкилоти - GIZнинг Қирғизистон ва Тожикистондаги лойиҳа раҳбарлари бошчилигида делегация Ахсикент археология паркига ташриф буюрди
Ахсикент GiZ ташкилоти билан бир неча йилдан бери самарали ҳамкорлик қилиб келади. Бунинг натижаси ўлароқ икки бор хорижий экспертлар иштирокида халқаро конференция ташкил этилди. Ахсикент делегацияси GiZ кўмагида ITB Berlin халқаро туризм кўргазмасида иштирок этди. Германиянинг Золинген шаҳри ва Ахсикент-Чуст ҳамкорлиги ўрнатиш бўйича Золинген сафари ташкил этилди.
- Ахсикентда буюк тарих билан тўқнашдик. Биз иш фаолиятимизда Ахсикент билан боғлиқ лойиҳаларни амалга оширишимиз мумкин. Бу икки томон учун ҳам самарали бўлади, - дейди GiZнинг Қирғизистондаги лойиҳа раҳбари Ханна Забасс.
14-16 октябр кунлари Германия халқаро ҳамкорлик ташкилоти лойиҳаси доирасида жамоатчилик туризм тармоғини ривожлантириш бўйича семинари бўлиб ўтганди. Унда Фарғона водийсида туризм соҳасини ривожлантириш масалалари муҳокама қилиниб, амалий ечимлар изланганди.
- Ахсикент - Фарғона водийси туризм тармоғида энг муҳим бўғиндир. Хорижий сайёҳларнинг асосий локацияларидан бўлган 3000 йиллик тарихга эга ушбу маскан бўйича истиқболда қатор лойиҳаларимиз бор, - дейди GiZнинг Наманган вилоятидаги вакили Фарҳод Мирзабаев.
Ҳозирда Ахсикентга ғарб мамлакатларидан келадиган сайёҳлар учун мақбул тур пакетларни ишлаб чиқиш бўйича иш олиб борилмоқда. 17-21 ноябр кунлари Германия турфирмалари водийга ташриф буюрадилар. Ташриф объектлари орасида Ахсикент археология парки ва SilkGranat миллий ҳунармандчилик ва туризм маркази ҳам мавжуд.
SilkGranat раҳбари Марина Джаббарова 3-13 ноябрь кунлари GIZ кўмагида Германия сафарида бўлиб, BerlinBazaar халқаро ҳунармандчилик ярмаркасида иштирок этади.
Тўрақўрғон тумани ҳокими Шерали Қосимов 1-сектор ҳудудидаги 22-умумтаълим мактабида ўрганишларини давом эттирди. Унда дарс жараёнлари, давомат, куз-қиш мавсумига тайёргарлик ҳолатлари асосий эътиборда бўлди.
822 нафар ўқувчи таълим оладиган мактабда ёшларга билим бериш учун ҳамма шароитлар яратилган. Ўғил-қизлар нафақат ўқиш, балки келажакда эгаллашлари керак бўлган касб-ҳунарларга ҳам шу ерда тайёргарлик кўришмоқда. Фан тўгараклари, устоз-шогирд анъаналари йўлга қўйилган.
Туман ҳокими синфларга кириб битирувчи ўқувчилар билан мулоқотда бўлди. Фанлар бўйича савол-жавоблар, мамлакатимиздаги ислоҳотлар моҳияти ҳақида гапирилди. Уларга катта ҳаётга қадам қўйиш остонасида турганлари боис зарур тавсиялар берилди.
Шу билан биргаликда куз-қиш мавсумига тайёргарлик, кўмир жамғарилиши ҳам кўздан кечирилди.
Касбий таълимни ривожлантириш юзасидан ҳамкорлик давом этади
Ўзбекистон Республикаси Президентининг "Касбий таълимда малакали кадрлар тайёрлаш тизимини янада такомиллаштириш ва халқаро таълим дастурларини жорий қилиш чора-тадбирлари тўғрисида"ги ПФ-158-сон Фармони ижроси доирасида Тўрақўрғон туманидаги 2-сон касб-ҳунар мактаби директори Гулчеҳра Қаюмова Наманган тўқимачилик саноати институтида бўлди.
📎Учрашувда институт ректори ва ходимлари билан касбий таълим соҳасидаги долзарб вазифалар, мавжуд муаммолар ва уларни ҳал қилиш йўллари ҳақида мулоқот қилинди. Унда инновацион таълим усулларини жорий этиш, ўқув дастурларини такомиллаштириш ва халқаро тажрибалардан фойдаланган ҳолда кадрлар тайёрлашда ҳамкорлик қилиш бўйича келишиб олинди.
Наманган тўқимачилик саноати институти матбуот хизмати.
Наманган вилоятида 1 638 809 нафар сайловчи овоз бериш жараёнларида иштирок этади
Бугун - мамлакатимизда Ўзбекистон Республикаси Қонунчилик палатаси ва маҳаллий Кенгашлар депутатлари сайлови бўлиб ўтмоқда.Мазкур муҳим сиёсий тадбирга Наманган вилоятида ҳам жиддий тайёргарлик кўрилди. Вилоятдаги мавжуд 837 та сайлов участкасида фуқароларнинг овоз бериш ҳуқуқидан тўлақонли фойдаланишларини таъминлаш учун зарур чора-тадбирлар кўрилди.
Вилоят ҳудудий сайлов комиссияси берган маълумотларга кўра, бугунги сайловларда жами 1 638 809 нафар Наманган вилоятида истиқомат қилувчи шахслар овоз бериш жараёнларида қатнашадилар.Сайловчиларнинг 52 615 нафари ёшлардан иборат бўлиб, уларнинг 33 822 нафари биринчи марта овоз бериш ҳуқуқидан фойдаланади. 18 793 нафар йигит-қизлар эса сайлов куни ва унгача 18 ёшга тўладиган ёш сайловчилар ҳисобланади.
Вилоят бўйича сайловчиларнинг 2898 нафари ўзгалар парваришига муҳтож шахслардир. Уларнинг 391 нафари ёлғиз кексалар, 177 нафари ёлғиз ногиронлиги бўлган кексалар, 1788 нафари ёлғиз яшовчи кексалар, 545 нафари ёлғиз яшовчи ногиронлиги бўлган шахслар ҳисобланади.
Шундан келиб чиқиб, сайловларда мустақил иштирок эта олмайдиган 2673 нафар сайловчига овоз бериш жараёнида кўмаклашиш учун ассистент бириктирилган. 8240 нафар шахсларнинг овоз беришда кўмакка муҳтож бўлиши аниқланди. 1800 нафар сайловчи кўзи ожиз, 1448 нафар сайловчи эшитишда нуқсони бор (кар-соқов), 1840 нафар сайловчи таянч-ҳаракат аъзоларида жиддий муаммо бўлган шахслардир. 3152 нафар шахслар эса бошқа сабабларга кўра овоз беришда ўзгалар кўмагига мухтожлик сезадилар.Юқорида таъкидлаб ўтилганидек, ногиронлиги бўлган шахсларни сайловдаги иштироки учун тегишли инфратузилмавий шароитлар яратилган.
Хусусан, овоз бериш хоналарига махсус жиҳозланган яширин овоз бериш кабиналари жойлаштирилди. Кўзи ожиз ва заиф кўрувчи сайловчилар мавжуд бўлган сайлов участкалари оптик лупалар билан, барча сайлов участкалари Брайль алифбоси асосида тайёрланган трафаретлар билан таъминланди.
Шунингдек, участка бинолари ногиронлар аравачасига мослаштирилган нишаб йўлаклари (пандуслар) ёки «ёрдамга чақириш» тугмаси билан жиҳозланган.
📍Наманган вилоят ҳудудий сайлов комиссияси матбуот маркази